Danskit sakkutuui tulunnit toqutaapput

Afghanistanimi septembarimi danskit sakkutuui toqunneqartut marluk, kukkunikkut tuluit sakkutuuinit toqunneqarput, sakkutuut ilaat kinaassutsiminik isertuussisoq Nyhedsaviisimut taama ilisimatitsivoq.
Allattoq Elisa Isaksen
novembarip 05-at 2007 08:22

Ilisimatitsisup illersornissamut tunngasumik atorfeqarnini pissutigalugu kinaassutsini isertuukkusuppaa.

Danskit sakkutuui Afghanistanip kujataani qooqqumi ’Upper Geresk’-imi Talebaninut akersuutileruttortut tamanna pivoq. Saassussinerup nalaani tuluit sakkutuui takkupput kukkunikkullu qaartartunik igeriuttakkanik danskit sakkutuui aallartitsivigalugit.

Septembarip 30-anni – qaartartunit igeriuttakkanit saassunneqarnerup kingornagut ullut sisamat qaangiuttut, danskit sakkutuui ilisimatitsipput, Afghanistanimi nunat tamat sakkutooqatigiivinit danskit saassunneqarsimanissaat pasitsaanneqartoq.

Taamatut pasitsaassinerup kinguneranik sakkutuut misissuisartuinit aamma tuluit sakkutuuinit pisoq misissoqqissaarneqalerpoq.

- Isertuussaqanngilagut, naak tamanna tusagassiuutini oqaatiginiarneqaraluartoq. Sakkutuut misissuisartuinit pisoq suli misissorneqarpoq tamannalu naammassippat soorunami oqaaseqarfigiumaarparput, Politikenip nittartagaanut taama oqarpoq sakkutuut tusagassiisartuat Kim Grünberger, Sakkutuut qullersaqarfianneersoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq