Danskit Ruslandimi aallartitarisimasaat Issittoq pillugu oqaaseqartartuulersoq

Issittoq pillugu nunanut allanut tunngasunut ministereqarfik Københavnimiittoq ullumimit nutaamik siuttoqalerpoq.
Assi © : NASA
septembarip 02-at 2019 09:09

Danmarkip Ruslandimi ukiuni arfinilinni aallartitaa, Thomas Winkler Danmarkip issittoq pillugu aallartitaqarfianiilerpoq.

Taassuma atuuffimmi, Hanne Fugl Eskjær Canadami danskit aallartitariligassaat taarserpaa.

AAMMA ATUARUK Nunanut allanut tunngasuni qaffasissumik atorfillip nunarput USA-lu imminnut qaninnerulersissavai

55-inik ukiulik, Thomas Winkler Københavnip Universitetianit eqqartuussissuserisutut 1988-imi ilinniagaqalerpoq.

Thomas Winkler Ruslandimut europallu kangianut tunngatillugu qasseeriarluni suliaqartarpoq, ilaatigut Moskvami 1990-imit 1992-imut Danskit Aallartitaqarfianni allattaalluni kingornalu Danmarkip Kievimi aallartitaqarfiani atorfinilluni.

Danmarkip issittoq pillugu aallartitaata Kalaallit Nunaat, Savalimmiut Danmarkillu Issittoq pillugu soqutigisai sinnerlugit nunarsuup sinneranut takussusertussaavai.

Thomas Winklerip toqqarneqarnera piffissami, Ruslandip Issittumut pingaartumik niuernermut sakkutooqarnermullu tunngatillugu soqutiginninnerminik takutitsingaatsiarnerani pivoq.

AAMMA ATUARUK USA-p aalajangersimasumik sinniisoqarfeqalerniarnera naalakkersuisut tikilluaqquaat