Danskit politikerit israelimiunik uparuartuilerput
Ministerit taakkua massakkut nunanut allanut ministerip Lene Espersenip nunanik EU-mut ilaasortanik ataatsimoortitsinissaa kissaatigaat, taakkualu Israel Kangiani Qiterlermi eqqissineqarnissaanik isumaqatiginninniarnissat aallarteqqinnissaannut pinngitsaalissagaat kissaatigaat.
Politikkikkut nuimasut pingasut Uffe Ellemann-Jensen, Niels Helveg Petersen Mogens Lykketoftilu tassaapput ataatsimoorlutik oqaatsillu sakkortuut atorlugit Israelip Palæstinamiunik tiguaasimanerminut politikkianik saassutarinnittut.
Politikki, ministeriunerup Benjamin Netanyahup ukiup aappassaa avillugu matuma siornagut pissaanermik tigusinerata kingornagut sakkortunerulersimasoq, Uffe Ellemann-Jensen oqarpoq.
- Ataatsimoorluta assorsuaq isumakuluutigaarput eqqissineqarnissaanik suliniuteqarneq ukiut marlussuit matuma siorna tikillugu apoqattartutut ililluni ingerlanneqaraluartoq ingerlariaqqiffissaarussimammat, taamaammallu Danmarkimut allanullu kajumissaarummik allappugut Israelimi naalakkersuisut aallartiffimminnut uteqqinnissaannik pinngitsaalineqassasut, taamaalilluta eqqissineqarnissaanik isumaqatigiinniarnerit aallarteqqinniassagatsigik, Uffe Ellemann-Jensen oqarpoq.
Nunanut allanut ministerip Lene Espersenip siulini pingasuusut Berlingske Tidendemi akisussaaffik tamaat Israelimut inissinniarmassuk Hamasilu Israelimik saassussineranik unnerluutiginianngimmassuk isornartorsiorpai.
Tamatumunnga Socialdemokratineersoq Mogens Lykketoft ima akissuteqarpoq:
- Lene Espersenip oqaaseqannginnermini taakkua pingasut allagaat atuarsimanngivinnguatsiarpai, taamaattorli oqarfigiumavara Danmarkip EU-mi oqartussaaqataanini atussappagu pingaartorujussuusorigakku, taamaalilluni Europa Israelip qanoq tunniussaqarnissaanut erseqqarissumik pissusilersorniassammat. Tamatta isumaqatigiippugut Hamas naammaginanngitsoq, taamaakkaluartorli aamma isumaqarpunga Palæstinami namminersorlutik ingerlatsisut eqqissineqarnissaa kissaatigigaat suullu tamaasa iluatinnaatillit atorlugit eqqissineqarnissaa anguniassagaat, taakkualu ikiorneqartariaqarput, Mogens Lykketoft DR-imut oqarpoq.
