Danskit politiikerii: Pilluaritsi

- Kalaallit Nunaata Danmarkillu isumaqatigiinniarnermikkut, namminersulernissaq pillugu isumaqatigiissutaata, inuiannit kalaallinit tapersersorneqarluarnera nuannaarutigeqaara. Kalaallit inuiattut akuerineqartussanngornerat namminerminnullu tunngasunut oqaasissaqarnerulernissaat pingaartorujussuuvoq, Helle Thorning-Schmidt oqarpoq.

Konservativit

Konservativit Kalaallit Nunaat pillugu oqaaseqartartuat Per Ørum Jørgensen aamma nuannaaqaaq.

- Taasinerup inernera pillugu kalaallit pilluaqqussallugit pissutissaqarluarpoq. Maanna Kalaallit Nunaata ineriartornerata siuariartorneratalu ingerlateqqinnissaannut akisussaaffik angisooq kalaallit tigusussanngorpaat, taamaalillutillu aningaasarsiornikkut kiffaanngissuseqarnerulissallutik, Per Ørum Jørgensen oqarpoq.

Venstret

Venstret Kalaallit Nunaat pillugu oqaaseqartartuata Henrik Høeghip namminersornerup 2009-mi juunip 21-anni pisortatigoortumik eqqunneqarnissaanut pilersaarutit piviusunngornissaat neriuutigaa.

- Kalaallit Nunaanni innuttaasut namminersulernissartik kissaatigilluinnarpaat. Tamanna marlunngornermi taasinerup ersersippaa. Taamaattumik taamatut kissaateqarnerup naalakkersuinikkut ingerlateqqinneqarnissaani ataqqineqartariaqarpoq, Henrik Høegh oqarpoq.

Enhedslisti

Line Barfodip Enhedslistimeersup kalaallit aamma pilluaqqorujussuarpai:

- Kalaallit imaannaanngitsunik maanna unammilligassaqalerput. Maanna aalajangertussanngorpaat, nunanut avannarlernut atugarissaarnermullu angusimasatsinnut qanillattussanerlutik imaluunniit allamut ingerlariaqqinniarnerlutik. Neriuppunga nunat avannarliit ingerlatsinerat qanillattussagaat, maannali nammineerlutik ingerlatsisussanngorput, Line Barfod oqarpoq.