Danskit pinerluuteqarsimasut Danmarkimut nassiunneqartalerput
Kalaallit Nunaanni pinerluttulerinermut inatsisip apriilip qaammataani allanngortinneqarneratigut Danmarkimi inatsiseqarnermut naalakkersuisoq pisinnaatitaalerpoq, pineqaatissinneqarsimasut Danmarkimi paarnaarussivimmi sorlermiissanersut aalajangersinnaallugu.
Torben Hyldgaard ukiut sisamat Kalaallit Nunaanni najugaqarpoq. Ikiaroornartumik hashimik Kalaallit Nunaannut eqqusseriarsimanini pillugu pineqaatissinneqarsimasut inissiisarfianni Aasianniittumi inissinneqarpoq.
Aalajangersimasumik suliffeqarpoq Kalaallit Nunaanniiginnarnissanilu kissaatigivaa, pinerluttulerinermulli inatsisip allannngortinneqaneratigut ataasinngorpat Danmarkimi parnaarussivimmut ammasumut nuunneqassaaq naak qaammatit marluk ullullu qulit pineqatissiissuutigineqartut amigaatigigaluarlugit.
- Kalaallit Nunaanni najugaqarpunga suliffeqarlungalu, avatangiisikka sungiusimasakka maaniipput, taamaattumillu sungiusimasamiit peersitaalerneq artornarpoq, Torben Hyldgaard oqarpoq.
Torben Hyldgaard ukioq 2004-imili Kalaallit Nunaanni najugaqarpoq aalajangersimasumillu suliffeqarluni. Maannakkut suliffigisamini sulisitsisunilu isumaqatigiissuteqarput pineqaatissiissut qaangiuppat suliffimmini suliinnarniarluni.
- Arnaq asasara Kalaallit Nunaanni najugaqarpoq, taamaattumillu annilaarnarpoq Danmarkimiittussanngornera tusarlugu. Misiligummik iperagaassussanngorluni suliffimmik najugaqarfissamillu piareersalereerluni taamatut pineqarluni orniginanngilaq, Torben Hyldgaard oqarpoq.
- Ukioq ataaseq affarlu aalajangersimasumik suliffeqarpunga taamaatumillu sulitsisora oqaluttuuttariaqarpara Danmarkimut nuutsitaanissara pillugu, soorunalimi sulisitsisuma ajuusaarutigaa.
Torben Hylgaard qallunaallu allat pingasut namminneq kissaatiginngisamminnik Danmarkimi parnaarussivinnut sapaatip akunnerata tulliani nuunneqassapput.
Kent Holmer ukiut qulingiluat Kalaallit Nunaanni najugaqarpoq. Pinerluuteqarsimanini pillugu Nuummi pinerluuteqarsimasunut inissiisarfimmiitinneqarluni. Pineqatissiissutigineqartunit ullut 42-it amigaatigai iperagaanissaminut. Taamakkaluartoq Kent Holmer ataasinngorpat Danmarkimi parnaarussivimmut Kragshoved Statsfængsel-imut nuunneqassaaq, ullullu 42-it parnaarussivimissaaq, Danmarkimi inatsiseqarnermut ministereqarfiup naliliinera malillugu, Kent Holmer ulluinnarni inuunermini Danmarkimut atassuteqarnerummat.
Kent Holmer ukiut qulingililuat affarlu Kalaallit Nunaanni najugaqarpoq ilaqutaqarluni ikinnguteqarlunilu.
Kalaallit Nunaanni pineqaatissinneqarsimasunut inissiisarfinni pisortaaneq Peter Søndevad oqarpoq, inatsisip nutaap atuutilerneratigut qallunaat pineqaatissinneqarsimasut inissiisarfinniittussanngorlugillu eqqartuunneqarsimasut Danmarkimut nuunneqartassasut.
