Danskit oqaasiisa atorneqaannarnissaat piumavaa
Naalakkersuisut Namminersulivinnissamut Inatsisissatut siunnersuutaani §20-imi ima allaqqasoqarpoq:
”Kalaallit Inuiattut oqaasii tassaapput Kalaallit Nunaanni oqaatsit pisortatigoortumik atorneqartussat”. Taamalu allassimasoqarnera Demokraatit tunuliaqutaralugit Inatsisartuni ilaasortap Lene Knüppelip maanna apeqquserpaa.
Ullumikkut Inatsisartuni ataatsimiinnermi pingaarnertut kalaallisut oqaatsit atorneqartarput, taakkualu toqqaannartumik danskit oqaasiinut nutserneqartarput. Kisiannili Inatsisartunut ilaasortaasoq tamakkiisumik kalaallit oqaasiinik atuisinnaanngitsoq saqqummiussassaminik danskit oqaasii atorlugit saqqummiussisinnaatitaavoq taakkualu saqqummiussaat toqqaannartumik kalaallit oqaasiinut nutserneqartarput, taama Lene Knüppel allappoq. Isumaqarami tamanna Demokraatinut pingaaruteqartorujussuusoq. Taassumattaaq erseqqissaatigaa innuttaasut danskisuinnaq oqaluttut ikinnerussuteqartuarallartussaanerat.