Danskit oqaasii navianartorsiorput
Tuluit oqaasii Danmarkimi ilinniarfinni qaffasinnerusuni ima atugaatigipput, allaat danskit oqaasii aarlerinartorsiortinneqarlutik.
Taama isumaqarput Danmarkimi Oqaasiliortut, Dansk Sprognævn aamma taakkua danskit ilinniarfiini qaqugukkut tuluit oqaasii atorlugit ilinniartitsisoqassanersoq malittarisassaqalernissaa kissaatigaat.
Danmarkimi ajortumik ingerlasoqarpoq ilinniaqqiffiusartunit 329-usunit 130-t tuluit oqaasii atorlugit ingerlanneqarnissaat neqeroorutigineqarmat, taama isumaqarput Danmarkimi Oqaasiliortut, Dansk Sprognævn. Tuluit oqaasii ilinniarfinnit qaffasinnerusunit ilinniarnertuunngorniarfinnut meeqqallu atuarfiinut tuniluutissapput tamatumalu danskit oqaasiisa atorneqarunnaarnerat kingunerissavaa, Dansk Sprognævn isumaqarpoq.
Danskit oqaasii ilisimatusarnermi atuartitsinermilu atorneqassapput, allamiut oqaasiinik ilinniartitsineq kisiat pinnagu, Dansk Sprognævn isumaqarpoq.
- Ilinniarfiit amerlanerujartuinnartut tuluit oqaasii kisiisa atorlugit neqeroorutaasalernerat ajornartorsiutaavoq. Tassami danskisut oqaatsit atorsinnaasat killeqaleraluttuinnassapput tamannalu inuiaqatigiinnut siaruaatissaaq, Dansk Sprognævnip pisortaa Sabine Kirkmeyer Andersen oqarpoq.
Danmarkimi ilinniartunit 115.000-iusunit 4.000-it nunanit allaninngaanneersuupput.
Danmarkimi Oqaasiliortut isumaqarput nunarsuarmiunngorsaaneq ingasaanneqarpallaalersoq.
Sabine Andersenip assersuutitut taavaa Europakommissionimi pisortap danskiusup danskinut oqalugiaatigisimasaa. Oqalugiaat taanna danskisut allagaagaluarluni tuluit oqaasiinik akuugaaqaaq. Tassami oqaatsit nutaat tamarmik tuluit oqaaserimmatigik.
Danmarkimi Oqaasiliortut Folketingip kulturimut ataatsimiititaliaanut allagaqaqqammerput kissaatigalugu, ilinniarnermi tuluit oqaasiisa qaqugukkut atorneqarnissaat pillugit malittarisassaqalertariaqartoq. Sapaatip akunnerata tulliani Danmarkimi oqaatsit pillugit inatsiseqalissanersoq Folketingimi oqaluuserineqassaaq.
Peter Østergaardip Århusimi Handelshøjskolimeersup tuluit oqaasiinik atuineq illersorlugu oqarpoq, ilinniartut naammassigunik nunarsuaq tamakkerlugu attaveqartussaammata tuluit oqaasii pisariaqartinneqartut.
