Danskit naalagaaffiat pisussaaffimminik eqquutsitsinngilaq

Nunanut allanut naalakkersuisuusimasoq, Inuit Ataqatigiit sinnerlugit Inatsisartuni ilaasortaq, Josef Motzfeldt, unioqqutitsisumik timmisartuussisarnerit eqqartorneqaqqilernerannut atatillugu ima apeqquteqaateqarpoq – issuaaneq allartippoq:

- Paasisariaqarparput 2001-imi oktobarimi NATOmi ilaasortat isumaqatigiissutaat, tusagassiorfitsigut maanna sammineqartoq, naalakkersuisunut apuunneqarsimanersoq. Isumaqatigiissummi USA-p sakkutuunut timmisartui akuerineqarput Danmarkip silaannartaanik atuisinnaassasut danskillu mittaarfiinut missinnaassasut, timmisartuussinerit pinerliinianut akiuiniarnermut tunngasuuppata’ – issuaaneq naavoq.

- Akuersissut pineqartoq ukiumut ataasiinnarmut imaluunniit allamik isumaqatigiittoqarnissaata tungaanut taamaallaat atuuppoq, Josef Motzfeldt oqarpoq.

- Isumaqatigiissutip 2001-imeersup sivitsorneqartarsimanerini danskit naalakkersuisuisa kalaallit naalakkersuisuinik nunanut allanut apeqqutini Kalaallit Nunaat ilaagaangat ilisimatitsisarnissaminnik pisussaaffitsik eqqortittarsimanngilaat, naak tamanna Itillimi isumaqatigiissummi 2003-mi maajimeersumi naqissuserneqareeraluartoq, Josef Motzfeldt allappoq.

- Qanittukkut NATO-mut ilaasortat tamarmiullutik Vilniusimi aamma Bukarestimi ataatsimeersuartarnerini 2001-imi isumaqatigiissutip qanoq atorneqarnera sammineqarsimassasoq ilimagisariaqarpoq.

NATOp ataatsimiinnerisa taakku pilersaarusiorneqarnerini kalaallit naalakkersuisui isumasiorneqarsimanerlutik? Josef Motzfeldt aperivoq.