Danskit ministeriunerat pisortatigoortumik utoqqatserusunngilaq

Tamatuma kingorna meerarsianngortinneqarlutilluunniit meeqqat angerlarsimaffiinut nuutinneqarput. Ministeriunerup Danmark sinnerlugu utoqqatsernissaa Folketingimut ilaasortap Juliane Henningsenip Inuit Ataqatigiinneersup piumasarigaluarpaa, tamanna pissusissamisuussasoq oqarluni, ministeriunerli utoqqatserumanani maanna tassa akissuteqarpoq.

Lars Løkke Rasmussen oqarpoq, Kalaallit Nunaata Danmarkillu attaveqatigiinnerat 1950-ikkunniilli ineriartorluarsimasoq.

- Oqaluttuarisaanitsinnili alianartunik aamma pisoqartarsimasoq ullumikkut nassuerutigisariaqarparput, ministeriuneq Juliane Henningsenimut akissummini allappoq.

Kalaallit meeqqat 1950-ikkut aallartilaarneranni Danmarkimiitinneqarsimanerat tamakkununnga ilaavoq, Lars Løkke Rasmussen allappoq.

- Tamatumunngali peqatigitillugu oqaatigisariaqarparput, Kalaallit Nunaanni Danmarkimilu eqqarsariaaseq taamanikkut allaaneroqimmat. Aamma paasisinnaasariaqassavarput meeqqat Danmarkimiitinneqarnerat Kalaallit Nunaanni Danmarkimilu oqartussanit ajunngitsumik siunertaqarluni iliuuserineqarmat, ministeriuneq erseqqissaavoq, taassumalu maluginiarpaa oqaluttuarisaanermi pisimasut allanngortinneqarsinnaannginnerat.

- Ullumikkut pissutsit allaanerunerat nuannaarutigisariaqarparput. Namminersornermik aaqqissuussinermi ataatsimoorluta oqaluttuarisaanerput Kalaallit Nunaata Danmarkillu akornanni ullumikkut naligiilluta ataqqeqatigiillutalu ineriartortipparput, ministeriuneq akissummini ilaatigut allappoq.

Taamalilluni suliassami oqaatigineqartussat tamakkerlutik maanna oqaatigineqanngillat. Kalaallit qallunaallu politikeriisa arlallit nalunaarutigereerpaat, pineqartoq Folketingip Kalaallit Nunaannut ataatsimiittaliaani oqaluuserisassanngortinniarlugu, oqaluttuarisaanerup qulaajarneqarnissaa siunertaralugu - meeqqanut pineqartunut 22-nut tunngasut kisiisa pinnagit, aammali pissutsit nunasiaanermi aamma 1950-ikkunni 60-ikkunnilu pisimasunut tunngatillugu.