Danskit ministeriat peqquserluttuliorsimaneranik pasineqartoq
DR-ip Ekstra Bladetillu ministerip ilisimatuutut allaatigisaata immikkoortuisa ilaanni atuakkamit assiliilluni ilanngussuisoqarsimaneranik paasisaqarnerisa kingorna tamanna pivoq.
DR-ip programmi PlagScan atorsimavaa. Programmi taanna ilaatigut Tysklandimi universitetit ilinniartut suliaasa peqquserluttuliorfiusinnaanerannik - tassalu allat suliaannik ilaartorsimanerannik - misissuinermut atorpaat.
Ministerillu teologii pillugu ilisimatuutut allaatigisaata programmi taanna atorlugu misissorneqarnerani ilaatigut allaatigisami inerniliussaq allat suliaannik ilaartorneqarsimasutut isikkoqartoq paasineqarpoq.
Tamannalu eqqarsarnartoqartoq, Bente Hagelund, Teologiimik Ilinniarfimmi Københavnimiittumi allattoqarfimmi pisortaasimasoq DR-imut oqarpoq.
- Allaatigisami inerniliussap ilaa allap allagaanit issuaannagaasutut isikkoqarpoq, allaatiginnittummi allap suliaanik atuisimanini innersuussuteqarsimanngilaq. Inerniliineq nammineq suliaatut isikkoqalersinneqarpoq, naak allap suliarisimagaluaraa.
Aammattaaq programmi pineqartoq atorlugu pisortat nittartagaanni allaaserisat assingusut 17-it nassaarineqarsimapput.
Esben Lunde Larsenip nassuerutigaa ilisimatuutut allaatigisamini kukkusimasinnaalluni, piaaralunili peqquserluttuliorsimanerarneqarnini eqqortuunngitsoq DR-imut oqaatigaa.
