Danskit Kalaallit Nunaanniittut ikiliartuinnarput
Kalaallit Nunaanni naatsorsueqqissaartarfimmit kisitsisit takutippaat, Kalaallit Nunaanni inunngorsimanngitsut, amerlanersaat danskiusut ukiorpassuarni annikitsumik ikiliartorusaarsimasut 1995-imiit ikiliartupiluulersimapput.
Danskit Kalaallit Nunaanniittut ikiliartornerat siornatigut danskinit atorfigineqakkajunnerusartut kalaallinit taarserneqartalersimanerannut ersiutaasinnaavoq, minnerunngitsumik qaffasinnerusumik ilinniarsimasut atorfigisartagaat eqqarsaatigalugit, inuiaqatigiit iluanni sunneeqatigiittarneq pillugu immikkut ilisimasalik, sociolog Maliina Abelsen taamatut naliliivoq.
Taamatulli oqareerluni, soorlu niviarsiat napparsimavinni amigaatigineqartut eqqarsaatigalugit taakkua aamma nunanit allanit amigaatigineqarnerat pissutigalugu aningaasarsiarissaarnerunissaasa saniatigut, Kalaallit Nunaannukarunik alutornartunik misigisaqartinnissaat, meeraasalu toqqissisimanartumik paaqqutarineqarsinaanerannut atuartinneqarsinnaanerannullu tunngasut neqeroorutigisinnaasariaqarpagut. Kalaallit Nunaannilu atorfininniartut aallaqqinngikkallarnissaat anguniarlugu aamma pisortatigut oqaatsit periutsillu inuiannut allanut inussiarnisaarnerusut atortariaqarput. Sulimi siunissami avataaniit tikisitat pisariaqartittuarallartussaagatsigit inussiarnisaarfigalugit oqarfigisariaqarpavut atorfissaqartillugit, sociolog Maliina Abelsen oqarpoq.
