Danskit kalaallinit imernerupput

Kalaallit imigassamik atuinerat annertunerarlugu danskinit ukiuni arlaqartuni quujassuaatigineqartarpoq , maannali danskit imigassamik atuinerat annertuneruvoq.

Naatsorsueqqissaartarfiup kisitsisit saqqummiussaani maanna takuneqarsinnaavoq,  Kalaallit Nunaanni imigassamik atuineq annikillingaarmat, inuttussutsinut naleqqiullugu naatsorsoraanni danskit imerajunnerupput, aviisi Fyns.dk taamatut allaaserisaqarpoq.

Naatsorsueqqissaartarfiup kisitsisit saqqummiussaani atuarneqarsinnavoq, imigassat aalakoornartortallit nunatsinnut eqqunneqartut ukiumut 9,8 literisut tassalu taakkua nunatsinni innutaasut 14 sinnerlugit ukiuliunnit imerneqarsimasutut naatsorsorneqarput, ukiorlu  2000miit ullumikkumut imigassamik atuineq ukiumut 3,7 literinik annikilleriarluni.
 
Nunatsinni imigassamik aalakoornartortalinnik  atuineq ukioq 2000miillu annikilliartorpoq

Uani erseqqissaatigineqassaaq kisitsisit naatsorsueqqissaartarfiup saqqummiussai,   imigassat aalakoornartortallit nunatsinnut eqqunneqartut pineqarmata, qanorli annertutigisumik imertoqarsimanersoq pineqarani.

Danmarkimi peqqinnissamut qullersaqarfiup kisitsisit saqqummiussai  malillugit,  danskit 14nit sinnerlugit ukioqartut ukiumut 11,1 literimik imersimapput. Tassalu nunatsinni imerneqarsimasunit 1,3 literinik annertunerullutik.

Danskeq 14nit sinnerlugit ukioqartoq  kalaallip ukiumut agguaqatigiissillugu immiaaqqaanik imersimasaanik 86 nik amerlanerusunik imersimavoq, imigassap aalkoornartua 4,6 procentiusoq uani naatsorsuinermi atorneqarluni.

Kalaallit putummakkaanerarlugit oqartarneq mumillugu danskit putummakkaanerarlugit oqartaliinnaraanni.