Danskit kalaallillu suleqatigiillutik ilinniarnissaq ajornannginnerulersippaat
Ukiaq manna siunissamilu pikkorissaanerit sivisuallaanngitsut arlallit Nunatsinni ingerlanneqassapput. Siornatigut imaakkaluarpoq pikkorissassagaanni kisianni angalaqqaarluni, tamannali Teknologisk Institutip 4 Dynamic Relationsillu maanna allanngortippaat.
-Kalaallit Nunaannit pikkorissarnermut peqataasussanik pissarsereerpugut, suliffeqarfiillu sulisuminnik piginnaanngorsaanissaminnut ajornannginnerusunik atugassaqartinneqarnissaat periusissatta ilagereermagu, Kalaallit Nunaanni pikkorissartitsinerit amerlinissaat pissusissamisoorsoraarput. Kalaallit Nunaanni sullitavut taamaasillutik ilinniarnissaminnut qaninnerulissassapput, Teknologisk Institutimi ilinniarfimmi pisortaq Janice Dyrlund Høst taama oqarpoq.
Pikkorissaanerit ukiaq manna neqeroorutigineqartussat ilaatigut tassaapput ”Inunnik piuminaatsunik kingunissaqarluartumik aqutsiniarneq”, ”Pisortaq, naalagaanngitsoq” aamma ”Kajumilersitsisinnaassuseqarneq”. Pileraarutillu malillugit ingerlasoqarpat, pikkorissaanerit aamma aappaagu amerlineqarumaarput.