Danskit isumalioqatigiissitamut ilaasortatitaat oqallinnermut akulerukkusuppallaanngillat
- Namminersorneq pillugu kalaallit qallunaallu isumaqatigiissutaat nunatsinnut pitsaasuua? Naamik, Demokraatit oqarput, pitsaanerusumik isumaqatigiissusiorsinnaavugut.
- Tamanna piviusorsiornerunngilaq, partit akuersaartut oqarput, taama oqartut ilagalugu naalakkersuisut siulittaasuat Hans Enoksen, pitsaanerusumik isumaqatigiissuteqarsinnaanngilagut, taakku oqarput.
Kisianni namminersorneq pillugu isumalioqatigiissitamut qallunaat ilaasortaatitaat qanoq oqarpat? Sianeqattaarnitsigut oqaaseqarusuppallaanngitsut paasivarput. Tassa kalaallit oqallinnerat annerusumik oqaaseqarfigineqarusunngilaq.
Venstre Konservativillu
Namminersorneq pillugu Venstret ilaasortaatitaat Kim Andersen aamma Konservativineersoq Per Ørum Jørgensen oqaaseqarusunngillat.
Enhedslisti
Enhedslistip ilaasortaatitaa Line Barfod aperineqarami pitsaanerusumik isumaqatigiissusiortoqarsinnaanersoq, annerusumik akissuteqarfigerusunngilaa.
- Isumaqatigiissutip naammassiniarnera ilungersunartorujussuummat eqqaamaneqartariaqarpoq, tassami isumaqatigiinniarnerit arlaleriarlutik ajalusoortarput, Line Barfod oqarpoq nangillunilu:
- Tassami isumaqatigiissummi annerusumik kalaallit kissaataat tunngavigineqarput. Isumaqatigiissut itigartillugu taasisoqassappat, taava Kalaallit Nunaata suniarnerluni isummerfigisariaqarpaa, Line Barfod oqarpoq.
SF: Allanngortinneqarnissaa ilimananngilaq
Kristen Touborg SF-imeersoq ersarinnerusumik oqaaseqarpoq. Aamma taassuma isumalioqatigiissitami isumaqatigiinniarnerit ilungersunaqisut innersuussutigai, taamaattorli ilaasortat tamarmik, Dansk Folkeparti kisiat pinnagu, naggataatigut isumaqatigiinnerat erseqqissarlugu.
- Isumaqatigiissummi matumani aningaasanut tunngasunut isumaqatigiissutit annerusumik allanngortinneqarsinnaanissaat ilimaginngilara. Mikisualunnut tunngasut kisimik allanngortinneqarsinnaassapput, Kristen Touborg SF-imeersoq oqarpoq.
DF oqaaseqarusunngilaq
Namminersorneq pillugu isumalioqatigiissitat inatsisissatut siunnersuutaat saqqummiunneqarmat, Dansk Folkepartip partini kisiartaalluni akerleraa. Tamannalu oqallinnermi isertuaatsumik oqaatigisarlugu. Taamaattorli innuttaasunik taasisitsinissaq sapaatip akunnerinnanngortorlu Søren Espersen isummaminik saqqummiusserusunngilaq.
- Maanna isumaqarpunga apeqqut tamanna Kalaallit Nunaata kalaallillu nammineerlutik isummerfigisariaqaraat, tamatumalu kingornagut oqaluusereqqissinnaassavarput, Søren Espersen oqarpoq.
Namminersorneq pillugu isumalioqatigiissitami qallunaat ilaasortaatitaat allat attaveqarfiginiaraluaratsigik iluatsinngitsoorpavut.
