Danskit Irakimi sakkutuui eqqaanneqangaatsiarput
Danskit Basrap avannaa–tungaani nakkutilliisut marloriarlutik sakkortuumik ippassaq eqqaanneqartarput.
Danskit sakkutuui 60-it missaannik amerlassuseqartut Basrap avaannaatungaani nakkutilliillutik angalaarput, eqqaanneqaleramik toqqorfissarsiorput, eqqaassisullu akillugit eqqalerlutik. Aviisiliortoq nakkutilliisunut ilaasoq ima oqaluttuarpoq:
- Ingerlaartilluta aqqusinermut ingerlaarfiulluartumut pigatta inuppassuit takuavut meeqqallu aalateripput. Tassanngaannaq eqqaasserpaluttunik tusaalerpugut qaartartullu igeriuttakkat tungitsinnut iginneqartalerput. Taava bilinit aqqapallappugut eqqaassisullu illumit suminngaanneernersut paasiniarneqarlutik. Illumi tassani nassaarineqarput aallaasit eqqarasuartaatit sakkullu inerteqqutaasut allat, eqqaassisulli qimaareersimapput.
Eqqaassinermi danskinik ikiligaasoqanngilaq, Irakimiunillu ikiligaasoqarnersoq takujuminaappoq, tassami eqqaassisut toqqoqqasarmata. Aviisiliortoq Bo Madsen taama oqaluttuarpoq.
