Danskit imminut qiviaqqaartariaqarput

Qimuttunik naalliutsitsisarneq pillugu Anders Fogh Rasmussen-imik akuliutsitseqqusilluni, Dansk folkeparti-p oqalunnera akuerinagu, Danskit nammineq nunaminni uumasunik naalliutsitsisarnertik qiviaqqaartariaqaraat, Ilulissani kattusseqatigiit sinnerlugit borgmesteri inatsisartunilu ilaasortaq Anthon Frederiksen oqarpoq:

- Danskit uumasunik naalliutsitsisarnertik nammineerlutik qiviaqqaartariaqarpaat, nunatsinniimmi uagut akuliunneq ajorpugut, nersussuit puulukilluunniit naalliutsinneqarlutik qimuttuitsunik lastbiilersuarnilluunniit assartorneqaraangata. Taamaammat Europamiut nammineq naalliutsitsisarnitik qiviaqqaartariaqarpaat. Anthon Frederiksen oqarpoq nangillunilu: - Kalaallit qimuttunik qimmillit tamarluinnarmik qimuttunik naalliutsitsisartutut isiginiarneqarnerat akuersaarneqarsinnaanngilaq, amerlaqaammi qimmiiteqallaqqittut. Ilulissat borgmesteriat, Kattusseqatigiillu sinnerlugu inatsisartuni ilaasortaq Anthon Frederiksen taama oqarpoq.

Qimmit paarinerlunneqartarnerat qanoq iliuuseqarfiginiarlugu, ilaatigut Hans Iversen, Naalakkersuisuni ilaasortaasimasoq, Qimussersuaasarsimasorlu Ville Siegstad suleqatigiillutik, Ilulissani sapaatiuppat oqallitsitsiniarput qimmeqarnermut attuumassuteqartut tamaasa peqataatillugit.