Danskit imerpallaarput
Danskit 500.000-it imerpallaartarput, tamannalu peqqissutsimut ajoqutaasarmat, Danmarkimi kræfti akiorniarlugu suliniaqatigiiffik siunnersuuteqarpoq. Siunersuutigineqarpoq arnat sapaatip akunneranut annerpaamik immiartorfiit arfineq-marluk imertassagaat, angutillu immiartorfiit 14-it.
Angutit amerlanerpaamik ullormut pingasut, arnallu amerlanerpaamik ullormut marluk. Tassa Danmarkimi Peqqissutsimut pisortaqarfia taamannak siunnersuisaraluarpoq, immaqali maannakkut siunnersuut allanngortinniarneqalerpoq. Kræfti akiorniarlugu suliniaqatigiiffimmi pitsaaliuinermi siunnersuisartoq, Nakorsaaneq Hans Storm isumaqarpoq taamatut siunnersuuteqarsimaneq ingasappallaartoq, peqqinnissamullu ajoqutaasartoq.
- Peqqissutsimut ataatsimiisitaliap siornatigut erseqqissartarsimavaa ikinnerpaaffissaq tassa ullormut angutinut pingasut arnanullu marluk imissallugu ajunngitsoq, tamannali kukkuneruvoq, nakorsaaneq oqarpoq.
Misissuinerilli kingulliit takutippaat, danskit 500.000-it imerpallaartartut. Sapaatip akunneranut 14-it 21-illuunniit imerneqartarneri ajornartorsiutaalersimavoq.
- Kræftimik napparsimalertarneq imerpallaarnermik aamma pinngortarpoq. Assersuutigalugu arnaq ikinnerpaamik qulinik sapaatip akunneranut imertarsimaguni, iviangimigut kræftelersinnanera qaninnerulersarpoq, nakorsaaneq Hans Storm oqarpoq.
Taamaammat kræfteqalertarnermik ilisimatuut europami siunnersuutaat assigalugu Kræftens bekæmpelse siunnersuuteqarpoq, Danmarkimi imissallugit siunnersuutitut killigitinneqartut appartinneqarnissaat.
Arnat annerpaamik sapaatip akunneranut arfineq-marluk angutillu amerlanerpaamik 14-it. Tassa siornatigut siunnersuutigineqarsimasut affaannaat siunnersuutigineqarpoq.
- Imigassartorpallaartarluni kræfteqalernissaq qaninnerulertarpoq, kisiannili aamma imigassartortarneq taqarsuakkut uummatikkullu nappaateqalernissaagaluanik pinngitsoortitsisinnaasarpoq. Taamaammat imigassap atorneqartarnera ingasaatinngikkaluarlugu atorneqartarnissaa siunnersuutigaarput, nakorsaaneq Hans Storm naggasiivoq.
