Danskit illersornissamut ministeriat Trine Bramsen nunatsinnut tikeraalersoq
Trine Bramsenip Kalaallit Nunaannut tikeraarneranut pissutaatinneqarpoq, danskit naalakkersuisuisuisa Kalaallit Nunaannut attaveqarnertik annertusarniarlugu kissaatigimmassuk, illersornissamut isumannaallisaanermullu apeqqutit pillugit Namminersorlutik oqartussanik qaninnerusumik akulikinnerusumillu oqaloqateqartarnissaq kissaatigineqamat, Trine Bramsen illersornissamut ministereqarfimmit tusagassiuutinut nalunaarummi taama oqarpoq.
Naalagaaffeqatigiinni ataqatigiinnerit pitsanngorsarneqassasut
- Kalaallit Nunaat suleqatigalugu Illersornissaqarfiup suliassai ukiuni aggersuni amerlisarniarpagut immaqalu kalaallit amerlanerusut illersornissap upalungaarsimanerullu ilaanniitilerlugit. Taamaalilluta Issittup nunarsuarmiunit assigiinngitsunit soqutigineqangaatsiarnerata nalaani Naalagaaffeqatigiinni tamatta sillimaniarnitsinnut toqqissisimanissatsinnullu atassuteqarneq pitsanngorsarsinnaavarput, Illersornissaqarfimmit, Trine Bramsen oqarpoq.
AAMMA ATUARUK Ministerip Issittumi Sakkutooqarfimmi kalaallit amerlanerulersikkusukkai
Trine Bramsen Nuummiiinnermini Nunanut allanut tunngasunut naalakkersuisumik Ane Lone Baggerimik aamma Ineqarnermut Attaveqaqatigiinnermullu Naalakkersuisumik Karl Frederik Danielsenimik ataatsimeeqateqassaaq.
Illersornissaqarfiup suliai kakkagigai
Illersornissaqarfiup Kalaallit Nunaanni suliai Trine Bramsenip takuniassavai, tassalu Issitumi Sakkutooqarfik aamma umiarsuaq sinerissami nakkutilliissut Ejnar Mikkelsen pulaassavaa, kiisalu illersornissaqarfiup timmisartunut Kangerlussuarmi immikkoortortaqarfia pulaassallugu.
- Illersornissaqarfimmi sulisutta Kalaallit Nunaanni suliassat pingaaruteqartut amerlasuut suliarisarmatigit kakkagivakka. Suliaasa ilaat inunnik annaassinermik kinguneqartarput, taakkualu suliaat qanimut takussallugit sapaatip akunnerani tullermi qilanaaraakka, Trine Bramsen oqarpoq.
