Danskit arnartaat kræfterlutik toqusartut amerlanerupput
Danskit arnartaat 100.000-iugaangata 141-t kræftimik ukiumut toqquteqartarput, ilisimatuussutsikkut paasisat pillugit aviisi Videnskab.dk taama allaaserisaqarpoq.
Ilisimatuut Italiamiut Europami nunani 34-ni kræfteqarlutik toqusartut pillugit misissuillutillu nalunaarusiortuupput.
Danmarkimi kræftimik napparsimallutik toqusartut amerlanersaat puammikkut kræfteqarnerminnik toqquteqarput. Tamannalu tupatornermik pissuteqarpoq.
Danskit arnartaasa kræftimik nappaateqalertarnerat toqusarnerallu allanik aamma pissuteqartoq paasineqarpoq, tassami Danmarkimi arnat siusissukkut sulilertarnerat kræftimik nappaateqalersarnerannut pissutaaqataanerarmassuk.
Danskit arnartaat kingusissukkut aamma qitorniulertarput. Kingusissukkut qitorniulertarneq arnat iviangimikkut kræfteqalernissaannut qaninnerulersitsisartoq, kræfti akiorniarlugu suliniaqatigiiffiup Kræftens Bekæmpelsep nakorsaanera Hans Henrik Storm oqarpoq.
Taamaakkaluartoq Danskit arnartaasa kræftimik napparsimalersarnerisa ikiliartornissaat naatsorsuutigineqarsinnaavoq, tassamigooq danskit arnartaat pujortartartut ukiut qulit matuma siornatigumut sanilliullugit ikinnerulerput.
