Danskit aningaasanut inatsisissaat IA-mit taperserneqarpoq
Aningaasaqarnermut ministerip Bjarne Corydonip aningaasanut inatsisissatut siunnersuut ukiormanna saqqummiummagu IA akuerseqataasinnaanani nalunaaruteqarpoq, ministerilli kingornatigut isumaqatiginninniaqatigineratigut UA allatut isumaqalerpoq. Kuupik Kleist Sara Olsvigilu ilaatigut danskit aningaasaqarnermut ministeriannut allagaqarput partiip inatsimmik akuerseqataassaguni sutigut pitsanngorsaasoqarnissaanik piumasaqaateqarlutik.
- Aningaasanut inatsisissap isumaqatiginninniutigineqarnerata naggataani danskit naalakkersuisui akuersitissinnaasimavagut, tamannalumi nuannaarutigeqaarput. Immikkoortulli ataasiakkaat allat aamma pitsanngorsarneqarnissaat kissaatigigaluarparput. Soorlu assersuutigalugu University of the Arcticimut tapiissutit qulakkeerneqarnissaat aammalu Pinerluuteqarsimasunik Isumaginnittoqarfimmut aningaasaliissutit amerlineqarnissaat, taakkulu soorunami sulissutigeqqissavagut, Sara Olsvig oqarpoq.