Danskit aallartitaqarfiat qaartartumeerniarneqartoq
Inuit pingasut Javap qeqqata ilaani kalerreeqqaarani misissuisoqarneratigut ippassaq tigusarineqarput. Misissuinermi politeeq ataaseq ikilerneqarpoq taavalu qaartiterutissat, allakkatut uppernarsaatissat sakkussallu arsaarinnissutigineqarlutik.
Inuit sisamaat Klatenimi nunap immikkoortuani akiuunnermi toqutaasoq politiit oqaatigaat.
Tigusarineqartut akornanniippoq palasi inuiaassutsimik ingasaassilluni pingaartitsisoq Abdulla Sunata. Taanna Indonesiami "inuttut ujarneqarnerpaajuvoq" taannaassangatinneqarlunilu pilersaarusiornermi pingaaruteqarnerpaajusoq.
- Qallunaat aallartitaqarfiat qaartartumeerusussimavaat profetip Muuamaap quiassuaatigalugu titartarneqarsimanera pissutigalugu. Taama aviisimut Jakarta Globemut oqarpoq politiit peqqarniisaarnianut immikkoortortaanni pisortaq Toto Karnavian.
Qallunaat aallartitaqarfiata qaartartummeerneqarnissaata saniatigut aammattaaq paasineqarpoq Indonesiami politiit juulip aallaqqaataani saassunneqarnissaat pilersaarusiorneqartoq.
