Danskit aalisartui puisinik ikilisaaqqusisut

Danmarkip imartaani puisit amerlinerujussuisa kinguneranik aalisartunut akornutaasorujussuanngorsimammata, puisit eqqissisimatitaagaluartut ikilisarujussuarneqarnissaat, qallunaat aalisartut piumasaraat. Aalisartut pisamik affaasa missaat puisinit kimmarneqarsimasarnerat pissutigalugu atorneqarsinnaasanngitsut oqaatigaat.
Assi © : KNR
Allattoq Nutaarsiassaqartitsivik / Nyhedsredaktionen
juulip 26-at 2013 05:20

- Bornholmip Stevnsillu eqqaanni aamma Kattegatimi Limfjordimilu puisit malunnartumik  amerlavallaalersimasut, Danmarkimi aalisartut peqatigiiffianni siulittaasup tullia Kim Kær Hansen oqarpoq.

Puisit ikisarneqarnissaat pisortat akisussaaffigigaat, aalisartut peqatigiiffiat isumaqarpoq.
Puisit ikilisarneqarnissaat pinngortitaq pillugu qullersaqarfimmit itigartitsissutigineqarpoq, puisit pillugit aqutsinissamut maleruagassaq naapertorlugu, soorlu qassutit aserorneqaraangata puisit qassutinik alittuisut aallaaneqarsinnaanerat innersuussutigalugu.

- Danmarkimi aalisartut peqatigiiffianni isumaqarput, pisortat aaqqiissutissanik periarfissiinissaasa tungaanut aalisartut ajunaarutiminnik taarsiiffigineqartariaqartut.

Tamannalu isumassarsiatsialaasoq, Niels Jepsen, Silkeborgimi DTU Aquami immikkut ilisimasalik isumaqarpoq.

- Aalisarnermi atortunik ajoqusiinernut, EU-mi nunanut taarsiissuteqarneq ajortunut ikittuinnaasunut Danmarki ilaavoq, Niels Jepsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq