Ukiut 40-t qaangiutillartullu: Dansk Melodi Grand Priximi kalaallisut erinarsoqqitoqqassaaq
Kalaallit erinarsortartut Julie Berthelsen aamma Nina Kreutzmann Dansk Melodi Grand Prix 2019-imut Herningimi Boxenimi arfininngornermi februaarip 23-ani peqataasussanngorput.
Erinarsuut tuluttoortoq 'League of Light' unammissutigissavaat, taannalu ilaatigut aamma kalaallisut taallartaqarpoq.
- Nalungilarput aamma allaanerulaarumaartoq uagut tuluttut erinarsoriaratta, kisiannilu aamma kalaallisut erinarsorluta. Naluarput Danmark qanoq isumaqassanersut. Ilimagaara uanga assut soqutigissagaat kusagulugulu, kisianni nalunaqaaq, Julie Berthelsen KNR-imut taama oqarpoq.
Erinarsugassaat League of Light uani tusarnaarsinnaavat.
AAMMA ATUARUK Julie Ninalu Melodi Grand Priximi peqataalersut
Rasmus Lyberth 1979-imi aamma taamaaliorpoq
Danmarkimili Melodi Grand Prixertoqarnerani aatsaat kalaallisut erinarsortoqalinngilaq.
Rasmus Lyberthimi 1979-imi aamma peqataavoq. Erinarsuut 'Ataatap qinnutaa' taamani unammissutigaa, peqataasunilu 17-iusuni normu 11-nngorpoq.
Allaaserisaq videop ataani nangippoq.
- Soorunalimi kalaallisut erinarsorniarpunga, aammalu sapinngisannik iliorniarlunga, Rasmus Lyberth AG-mit 1979-imi apersorneqarluni taama oqarpoq.
Kalaaleq erinarsortartoq nuimasoq alla, Aviaaja Lumholt, Dansk Melodi Grand Priximi aamma siornatigut peqataavoq.Tamanna 1990-imi pivoq, erinarsuullu 'Fordi jeg elsker dig' unammissutigaa. Peqataasunit quliusunit normut 6-inngorpoq.
Taamani peqataanera videomi ataaniittumi isiginnaarsinnaavat: