Dansk Folkeparti meeqqanut checki pillugu akuliuppoq

Danmarkimi meeqqanut tapiissutinut maleruagassat allanngortinneqarniariartut savalimmiormiut kalaallillu Folketingimi ilaasortaatitaat naammagittaalliortuatsianngorput.

Maleruagassammi nutaat malillugit angajoqqaajusut ukiut qulit Danmarkimi najugaqareersimappata aatsaat meeqqanut tapisisinnaanngussapput.

Taamatulli naalagaaffeqatigiikkaluarluni immikkoortitsineq pissusissamisuunngilaq, Dansk Folkepartip Kalaallit Nunaat Savalimmiullu pillugit oqaaseqartartuat Martin Henriksen taama oqaaseqarpoq.

- Naalagaaffeqatigiit iluanni innuttaasut immikkoortinneqartussaanngillat, Martin Henriksen oqarpoq.

Dansk Folkeparti allannguutissamut isumaqataasimagaluarpoq tamanna naalakkersuisuusut siuliisa nalaanni akuersissutigineqarmat.

- Uagut isumarput malillugu nunat allamiut tikiinnavillutik qallunaat atugassarissaarnissamut pisinnaatitaaffii ingerlaannaq atugarisussaanngilaat, pisinnaatitaaffimmi taakku qallunaatut innuttaassusiliinnarnut atuuttussaasorigatsigit. Kalaallimmi Savalimmiormiullu qallunaatut innuttaassuseqarmata nunat allamiuusutut naatsorsuuneqartussaanngillat, Martin Henriksen taama oqarpoq, maleruagassallu ministeriunerup misissoqqissagai noqqaassutigisimanerarlugu.

Savalimmiomiullumi folketingimi ilaasortaatitaat Sambandsflokkurinimeersoq Folketingimi naggataarutaasumik oqallittoqarmat kamaammersimarpaloqaluni oqaluttarfimmut qaqivoq.

- Savalimmiormiut Kalaallillu naalagaaffeqatigiinni ilaasortaapput. Taamaammat innuttaassuseqartutut pisinnaatitaaffiit ukiut arlallit atorlugit pissarsiarinialissappassuk pissusissamisuunngilluinnarpoq. Naalakkersuisunngortummi atorfilittaasa maleruagassat nutaat paasinerlussimaneramikkit innuttaasut Savalimmiuusut Kalaallillu nunat allamiuusutut naqissusersimavaat, tamannalumi kukkuneruvoq annertooq, Edmund Joensen oqarpoq.

Aamma maleruagassat nutaat malillugit meeqqanut tapiissutisisalerniaraanni nunat allamiut pinngitsooratik pilersuisoqartussaanerinik piumaffigineqartussaaneri ilinniartunut, angajoqqaanullu kisermaanut eqquinerluttussapilussuuvoq.

Taamaariarmat maleruagassanik allannguinissamut siunnersuusiortoq akileraarusersuinermut ministeriusimasoq Troels Lund Poulsen Edmund Joensenip attaveqarfigaa, susoqarsimanersorlu paasiniarlugu.

Taassumali oqaaseqarnera malillugu maleruagassat Kalaallinut Savalimmiormiunullu atuuttussaasimanngikkaluarput, Inunnilli isumaginninnermut ministeriaqarfik Akileraarusersuinermut ministeriaqarfiup attaveqarfigisimagaat KNR-mut ilisimatitsissutigineqarpoq, tassalu maleruagassat Savalimmiormiunut Kalaallinullu atuukkunnartinneqarsinnaanersut misissugarineqalersoq oqaatigineqarpoq, sulilu suliaq ingerlanneqarmat qanoq pisoqarumaarnersoq oqaatigineqarsinnaanani.

Inuit Ataqatigiit sinnerlugit Folketingimi ilaasortaq, Sara Olsvig, suliamut aamma ilanngussimasoq oqaatigineqarpoq, Akileraarusersuinermut ministerip nassuiaassuteqarnissaa noqqaassutigisimallugu.