Dannebrogip inuttai merissattut
Dannebrog maannakkut Nuup umiarsualiviani taleqqavoq, Savalimmiuniillu Nuup tungaanut ingerlaarmat umiartornerluttunut ilungersunarsimavoq.
Kunngikkormiut umiarsuaat Dannebrog nunatta imartaani siullermeerluni angalavoq ukiut 59-it matuma siornatigut.
Dronningikkut nunatsinni angalanertik nunatta avannaarpiarsuani arfininngorpat aallartissavaat. Sermersuarmi sermit pillugit ilisimatusarfik NEEM unnuiffigereerunikku sapaatiuppat nunatsinni nunaqarfiit avannarlersaannut Siorapalummukassapput.
Kunngikkormiut umiarsuaat Dannebrog nunarput sinersorlugu angalalereerpoq. Umiarsuaq Nuup umiarsualivianut ullaaq talippoq, Savalimmiunit toqqaannartumik ingerlareerluni. Dannebrog imarpissuakkoortilluni malissuarsiorsimaqisoq inuttanit oqaluttuarineqarpoq, inuttaasunullu aatsaat taama isorartutigisumik angalasunut imaannaasimanngilaq. Kunngikkormiut umiarsuaata Dannebrogip ukiunik 80-inik pisoqaassuseqartup 79 meterinillu takissuseqartup imarpik ikaarmagu inuttat ilaat merissassimasut, umiarsuup naalagaa Lars Rosendahl Christophersen oqaluttuarpoq.
22-nik ukiulik Simon Andersen sukkutuujunerminut atatillugu Dannebrog-imi inuttaasoq oqaluttuarpoq inuttat ilaat umiartullaqqinnerpaajunngitsut meriariartorlutik silaannarissariaqattaartariaqartarsimasut.
Dannebrogip naalagaa Lars Rosendahl Christophersen, sakkutoorlu Simon Andersen aatsaat nunatsinniipput.
- Kunngikkormiunut immikkut suliaavoq, maannakkut angalaneq una sivisuvoq isorartullunilu, pinngortitaq allaavoq, Danmarkimi sungiusimasamit allaanerulluni tamannalu immikkut misigisaavoq, Lars Rosendahl Christophersen oqarpoq.
Sakkutuujunerup nalaani imarsiorluni sakkutuujuneq qaammatinik qulingiluanik sivisussuseqartarpoq. Simon Andersen maannakkut qaammatit arfinillit Dannebrogimi inuttaareerpoq.
- Pissanganartorujussuusimavoq, aqqusaakkat misigisallu pissanganartut aqqusaarneqartarput, soorlu silapilussiornermi siullermi allarpassuillu misigisassaapput ajunngeqaarlu. Dannebrogimik angalanermi Dronningi kunngikkormiullu angalaqatigineqartarput, tamannalu immikkut misigisassaavoq, sakkutooq Simon Andersen oqaluttuarpoq.
Dannebrog Upernavimmukarluni Nuummiiit unnugu aallassaaq. Dronning Margrethe Prins Henrillu marlunngorpat Dannebrogimut ikissapput, umiarsuarmik nunarput sinersorlugu angalassallutik.
Dronningikkut Aasianniit Nuummut juulip 16-anni timmisartussapput, tassanngaannit Dannebrogimik Paamiunukassallutik kingornalu kujataani angalassallutik.
Dronningikkut nunatsinni angalanerat KNR-imit malinnaaffigineqassapput. Dronningikkut angalanertik Narsarsuarmi juulip 25-ani naggasissavaat.
Linki ataaniittoq toorlugu takusinnaavat nunap assinga Dronningip nunatsinni tikeraarfissaanut takussutissaq.
