Dannebrog Reykjavikimi erfalaqqissanngilaq

Danskit erfalasuat, Dannebrog, Savalimmiut Reykjavikimi sinniisuutitaqarfiata silataani erfalataaqqissinnaajunnarpoq.

Savalimmiut erfalasuat ilisaritinneqarluni Islandimi sinniisuutinneqalerpat, Dannebrog savalimmiormiullu erfalasuat Savalimmiormiut Islandimi sinniisuutitaqarfiata silataani sanileriillutik erfalassanersut assut oqallisaasimavoq, Savalimmiunilu tamatuma oqallissutaanera misigissutsitigut sapaatip akunnerini kingullerni marlussunni attuisimaqaaq, Sermitsiami taama allattoqarpoq.

Suliarli nunat pineqartut oqaloqatigiinnerisigut maanna aaqqinneqarpoq.

Sinniisuutitaqartitsinissaq illorsuarmi namminersortumi ingerlanneqartussanngorpoq pilersaarutaareersutut allaffimmi danskit aallartitaqarfiani Reykjavikimiittumi ingerlanneqassanani.

Savalimmiormiut islandimiut illoqarfiisa pingaarnersaani Dannebrog taamaalillutik erfalataartissanngilaat.

Savalimmiut erfalasuat Danmarkip akuerinngisaannarsimavaa, tassa savalimmiormiut isiginnittaasiat malillugu. Altingilu ukiut 1000-inngorlugit Islandimi 1930-mi nalliuttor-siutigineqarmat, taamanikkut ministeriunerusoq, Thorvald Stauning, peqqusisimavoq, erfalasoq peeqqullugu, tassa Savalimmiut erfalasuat akuerisaanngikkallarmat, ima oqarluni: ”Erruut taanna peerniarsiuk”.

Aatsaallu Savalimmiut 1948-mi namminersornerulermata Savalimmiut erfalasuat danskit tungaanniit pisortatigoortumik akuerineqalersimavoq.