Danmarkip siulittaasuunissaa Kalaallit Nunaannut iluaqutaassaaq
- Kalaallit Nunaata pilersaarutinut ilanngussai, pingaartumik Atlantikup avannaani suleqatigiit, NORA-p, saqqumilaarnerulernissaanut tunngasut aallarniutaapput, tamatumanilu neriuutigaarput nunat avannarliit Canadamik suleqateqalernissaat aallartinneqassasoq, Naalakkersuisunut ilaasortaq Palle Christiansen oqarpoq.
Kulturimut tunngasunut pilersaarummi Kulturi pillugu Oqalliffik - oqaloqatigiilluni ataatsimeersuarnerusoq aamma nunani avannarlerni soqutigisaqaqatigiinnit peqataatitaqarfiusoq - Kujataani 2010-mi aggustip qeqqani pisussatut pilersaarutigineqarpoq.
Taamatut inissiineq Kujataata Nunarsuarmi eriagisassanut ilanngunneqarnissaani avammut nittarsaassinertut isigineqassaaq.
- Aammattaaq pisunut tamanut atatillugu nunani avannarlerni siunnersuisoqatigiit ataatsimiititaliallu Kalaallit Nunaanni annertunerusumik ataatsimeersuartarnissaat pillugit oqaaseqartartuussaagut.
Suleqatitta nunanit allaneersut maanga siullermeerlutik tikeraaraangata Kalaallit Nunaanni pissutsinik paasitinniartarnerat misilittagaqarfigaarput, Naalakkersuisunut ilaasortaq Palle Christiansen oqarpoq.
"Nunat avannarliit siuariartortut", taama qulequtserlugu Danmarkip nunarsuarmioqatinut qanillattornissap sammineqarnissaani pilersaarutini kajumissaarutitut periarfissatullu aallartippai. Danmarkimi siulittaasuutitat kissaatigaat, silamut avatangiisinullu tunngatillugu unammilligassat pineqartillugit, nunat avannarliit tassaassasut nunap immikkoortortaat avatangiisinik mianerinnittut siuarsimalluinnartullu.
