Danmarkip Pituffik imaani annaassianernut piukkuppaa

Qallunaat ministeriunerata USA-p præsidentia Barack Obama ataatsimeeqatigimmagu Pituffiup inuinnarnit atorneqarsinnaanngornissaa ammaffigineqarpoq. Helle Thorning-Schmidtip Folketingimi ullumi tamanna uppernarsarpaa.
februaarip 29-at 2012 13:37

- Pituffimmi sakkutooqarfimmik nalilersuinerput suli naammassinngikkaluarparput, sakkutooqarfiulli inuinnarnut atorneqarnerulersinnaanngornissaa kalaallit, amerikamiut, uagullu danskit akunnitsinni eqqartorlugu aallartereerpugut.

Helle Thorning-Schmidt USA-p præsidentianik ataatsimeeqatiginnissimasumut, Siumut sinnerlugu folketingimut ilaasortap, Doris Jakobsenip, Pituffimmi sakkutooqarfik pillugu apeqquteqarmat Helle Thorning-Schmidt taama akissuteqarpoq.

Tamatuma saniatigut Doris Jakobsenip apeqqutai allaganngorlugit ministeriunerup akiniarlugit oqaatigaa, eqqartorneqartullu pillugit Doris Jakobseni siunissami oqaloqatigisarniarlugu neriorsuutigalugu. ministeriunerullumi akissutai Doris Jakobsenip naammagisimaarpai:

- Helle Thorning-Schmidt USA-mut aallannginnerani apeqquteqarlunga allaffiginikuuara, qujanartumillu tamakku Obamamut qaqilersimavai, aamma ataatsimiinnerannut tunngasut allaganngorlugit tigusussaavakka, tamannalu uannut qujanaqaaq, Doris Jakobsen oqarpoq.

Doris Jakobsenilli isumassarsiaa nutaajunngilaq, issittumimi annaassiniartarnermut Pituffiup aallaaviunissaa Amerikamiunut oqaloqatigiissutigineqartareerpoq. Qallunaat nunanut allanut tunngasunut ministeriata, Villy Søvndalip, Hillary Clinton decembarimi ataatsimeeqatigereerlugu Folketingimi Kalaallit Nunaat pillugu ataatsimiititaliamut januaarimi taama paasisissutigaa.

- Tamanna nuannaarutissaavoq, tassami nalunngeriikkatsituut Danmarkip USA-llu akunnerminni tamakku eqqartorsimagaat ilisimalereeratsigu, Sara Olsvigoqarpoq.

Issittup imartaani nakkutilliinermut, annaassiniarnernut, uuliasiornermilu ajutoortoqassagaluarpat Pituffiup atortorissaarutai atussallugit piukkunnartuusut Folketingimi sinniisuutitatta tamarmik oqaatigaat.