Danmarkip naalakkersuisortaavi aajuku
- Socialdemokraatit Radikalellu kingumut naalakkersuisuutitaqalerpugut. Partiiuvugut oqaluttuarisaanitsinni arlaleriarluta suleqatigiittarsimasut, sulinissatsinnullu qilanaaqaagut, ministeriuneq Amalienborgip silataani tusagassiortunut taama oqarpoq.
Ministerinik nikititerinermi matumani ministeqatigiit tamarmiullutik takkussimapput, ilisimaneqartutummi SF naalakkersuisooqatigiinnit tunuarpoq taamaattumillu naalakkersuisut nutaat pilersinneqarlutik. Naalakkersuisooqatigiillu Thorning 2.0-imik taaneqarput.
Nunanut allanut ministerissamik toqqaasoqarnissaa Nunatta tungaanit pissanngatigineqarsimavoq. Toqqagaasorlu tassaavoq silap pissusiinut tunngasunut nukissiuuteqarnermullu ministeriusimasoq radikaleneersoq Martin Lidegaard 47-nik ukioqartoq, taannalu ministeritut atorfimmil oqimaatsumik maanna ingerlatsisussanngorpoq. Nunatsinnullu tunngatillugu immikkut eqqaasariaqarpoq. Angutaami atuakkiortoq palasi Mads Lidegaard Nunatsinni ilisarisimaneqarluarpoq. Knud Rasmussenip højskolieanik tunngavileeqataasimavoq, Det Grønlandske Selskabimi siulittaasuulluni aammalu Kalaallit Nunaannut Ministeriaqarfimmi sulisuusimalluni.
Maannalu nunanut allanut minsterinngortoq ilaquttami Danmarkimut nooreersut inunngorsimagaluarluni, meeraallu Nuummiittarsimavoq.
Aammattaaq meeqqanut tunngasunut, inuiaqatigiinnut akuulersitsiniarnermut isumaginninnermullu tunngasunut ministerimik nutaamik toqqaasoqarpoq, tassalu Manu Sareen, siornatigut Naligiissitaanermut Ilageeqarnermullu ministeriusoq. Taassuma Kalaallit Danmarkimiittut inooqataaniarnikkut ajornartorsiutillit ikiorserneqarnissaannut nuna tamakkerlugu periusissap timitalerniarnissaa isumagisussanngorpaa. Facebookimi quppernermini ministeritut atorfittaani qangali anguniagarisimallugu allassimavoq.
- Inersimasutut inuunerma annersaani inuit ajornartorsiutillit sullittaraakka, ilaatigut inunnik isumaginninnermi sulisutut aammalu aaqqiagiinngittoqarnerani isumaqatigiissitsiartartutut. Misilittakkat taakku ministeritut sulinissanni atorluarsinnaavakka, taama allappoq.
- Ministeriuneq Helle Thorning-Schmidt
- Aningaasarsiornermut nunami namminermullu ministeri Margrethe Vestager
- Aningaasaqarnermut ministeri Bjarne Fog Corydon
- Nunanut allanut ministeri Martin Lidegaard
- Akileraartarnermut ministeri Morten Østergaard
- Suliffeqarnermut ministeri Mette Frederiksen
- Inatsisinik atortitsinermut ministeri Karen Hækkerup
- Ilinniartitaanermut ilisimatusarnermullu ministeri Sofie Carsten Nielsen
- Kultureqarnermut ilageeqarnermullu ministeri Marianne Jelved
- Illoqarfinnut, ineqarnermut nunap immikkoortuinut nunanillu avannarlernik suleqateqarnermut ministeri Carsten Hansen
- Ilinniartitaanermut minister Christine Antorini
- Peqqissutsimut pitsaaliuinermullu ministeri Nick Hækkerup
- Illersornissamut minister Nicolai Wammen
- Meeqqanut tunngasunut, naligiissitaanermut isumaginninnermullu ministeri Manu Sareen
- Inuussutissarsiornermut siuarsaanermullu ministeri Henrik Sass Larsen
- Silap pissusiinut tunngasunut, nukissiuuteqarnermut illuuteqarnermullu ministeri Rasmus Helveg Petersen
- Inuussutissanut, nunalerinermut aalisarnermullu ministeri Dan Jørgensen
- Niuernermut ineriartortitsinermullu ministeri Mogens Jensen
- Assartuussinermut ministeri Magnus Heunicke
- Avatangiisinut ministeri Kirsten Brosbøl
