Danmarkip Kangilinnguani sakkutuuliinerunissaa pissusissamisoorsoraat

Illersornissaq pillugu isumaqatigiissutikkut Danmarkip Kalaallit Nunaata annertunerusumik sakkutuulernissaa aallartippaa, tamannalu Kangilinnguani sakkutooqarfimmi pisortaasimasup Axel Fiedlerip aarleqqutigaa.

Kisianni Inatsisartut Nunanut allanut Sillimaniarnermullu Ataatsimiititaliami ilaasortat marluk, Demokraatineersoq Justus Hansen Siumumeersorlu Aleqa Hammond, aarlerinngillat. Nunammi allat Issittumi aamma sakkutuuliinerulerput:

- Nunarsuarmioqatigiit Issittumut maanna isigipput, periarfissallu annertusiartornerisa ilutigisaannik Issittumi annertusaajartorniarlutik iliuuseqalersaarrapput. Danmarkillu tamanna soorunami aamma iliuuseqarniarfigaa, Aleqa Hammond oqarpoq, nangillunilu:

- Kisianni sakkutooqarnikkut pissaaneqarniarnermut Nunarput atorniarneqassappat akuersaarsinnaanngilarput, Nunatsinnili pisussaaffitik pitsaanerusumik kivissinnaalissapatigit, taanna uagut peqataaffigissavarput toqqissisimanartillugulu, Siumut sinnerlugu Inatsisartut Nunanut allanut Sillimaniarnermullu ataatsimiititaliaanni ilaasortaq Aleqa Hammond taama oqarpoq.

Ataatsimiititaliap siulittaasua Hans Aronsen, Inuit Ataqatigiinneersoq, oqaaseqartinniaraluaratsigu iluatsinngilarput.