Danmarkip Irakimi sorsoqataanera oqallisaaqaaq

Danmarkip Irakimi Saddam Husseini peersinniarlugu sorsoqataanera ajunngilaq. Irakimili eqqissisimatitsiniarluni suliniarnerup pilersaarusiorsimanera ajorpoq, taama statsminister Anders Fogh Rasmussen, danskit aviisiinit ullaaq manna oqaaseqarpoq.

Politikenimut oqarpoq, Irakimi ullumikkut pissutsit atuuttut soorunami naammaginanngitsut, 2003-millu ineriartorneq ilimagisamit allaanerusimasoq.

Statsministerillu oqaatigaa, Irakimi marloriarluni tamat oqartussaaqataanerat atuutilerseqqinniarlugu innuttaasunik taasisitsisoqarsimanera ajunngitsutut naliligassaasoq.

-Kisianni ilimagisimanngisaannarpara upperisaq tunngavigalugu akerliuneq taama atsigissasoq.

Kitaani nunatut allatulli isumaqarsimagaluarpunga, tamat oqartussaaqataanerannik ingerlatseriaaseq Irakimi aamma tamanit kissaatigineqartoq. Isumaqarsimagaluarpungalu ikiuunnitsinni tikilluaqqusaangaassalluta, Anders Fogh Rasmussen oqarpoq.

EkstraBladet-ip allaaseraa statsministerip siornatigut Irak sakkussiaassuaateqarnerarlugu oqartarsimanera. Ullumili oqarpoq, sakkussiaassuaateqarneranik oqartarneq naalagaaffiit arlallit peqatigalugit Irakimut sorsoqataalernerminnut pissutaanngitsoq. Pissutaanerarpaalu Saddam Husseinip Naalagaaffiit Peqatigiit isumannaallisaaniaqatigiivinut ukiuni aqqaneq-marlunni suleqataarusuttarsimannginnera.