Danmarkip aningaasaliisalernissaa ujartorpaa
- Piniakkat uumassusillit eqqarsaatigalugit kommunerujussuanngortussat annertunerusumik aqutseqataalernissaanni naalagaaffeqatigiinneq aamma eqqarsaatigineqartariaqarpoq, KNAPK-p siulittaasorisimasaa Leif Fontaine, Piniarnermik inuussutissarsiuteqarneq pillugu isumasioqatigiissitsinerup nalaani taama oqarpoq. Naalagaaffeqatigiinneq eqqarsaatigalugu piniartut Danmarkip aningaasaleeqataaffigisariaqarai taassuma ujartorpaa.
Allattoq Mads Lynge
februaarip 20-at 2008 16:49
Leif Fontaine ima oqarpoq:
- Innuttaasut oqartussaaqataanerisa nutaamik aqutsinikkut aaqqissuussiffigineqarneranni Danmarkip aningaasaleeqataaffigissallugu pisussaaffigaa. Naalagaaffeqatgiippugut, aamma nunat tamat isumaqatigiissutaanni allassimasoqarmat oqartussaaqataaneq nunani tamani siuarsarneqartussaasoq, Danmarkilu naalagaaffeqatigiinnermi akisussaasuummat isumaqarpugut tamatuma anguniarneqarnerani aningaasaleeqataasussaasoq, Leif Fontaine oqarpoq, nangipporlu:
- Naalakkersuisut uagut innuttaasugut sinnerluta Danmarkip naalakkersuisuinik oqaloqateqarlutik tamanna anguniartariaqaraat isumaqarpugut, Leif Fontaine oqarpoq.
KNAPK’p siulittaasua Peter Olsen oqaaseqartinniaraluaratsigu iluatsinngilarput.
