Danmarkip aallartitat marluk anisippai
Sapaatip akunnerata ataatsip qaangiutinnginnerani Danmarkimiit qimagutereersimassapput.
Qallunaat nunanut allanut ministeriat Anders Samuelsen ataasinngornermi tusagassiortunik katersuutsitsinermi taama oqarpoq.
- Pisumik akuersaanngerluinnarnerput taamaasilluta ersarilluilluinnartumik takutipparput, Anders Samuelsen oqarpoq.
Taamatut aaliangiussaqarneq "Immikkuullarilluinnartutut" Samuelsenip oqaatigaa, siornatigummi russit aallartitaat ataasiaannarluni Danmarkimiit anisinneqarnikuummat.
Naak kilitsissiaasimasumik kinarpiaq saassussisimanersoq ersarissumik ilisimaneqanngikkaluartoq russit taamaasiorsimanissaat Samuelsenip qallunaallu naalakkersuisuisa qularinngilaat.
Saassussinermi toqunartoq Novichok atorneqartoq aaliangiinermut aallaaviuvoq, toqunartormi taanna Russit pilersitarisimammassuk.
Sapaatit akunneri marluk matuma siornali Russit aallartitaat 23-t Tuluit nunaanniit anisinneqareersullu Qallunaat taama qisuariaateqarput. Aamma nunat allani russit aallartitaat anisiortorneqartussanngortut ataasinngornermi aaliangiunneqarpoq. Assersuutigalugu Tysklandimi aallartitat sisamat anisinneqarput, USA-milu aallartitat 60-inik ikinnerunngitsut aamma anisinneqartussanngorlutik.