Danmarkimut saarngujartorneq aningaasanut tunngasuinnaanngilaq
Inuit 71-it 65-70-illu akornannik ukiullit 2010-mi nunatsinniit Danmarkimut nuupput. Kisitsisit aamma takutippaat nuuttunit 71-nit 64-it nunatta avataani inunngortuusut. Soraarnerussutisiallu amerlassusaat kisimi pissutaasinnaasorineqanngilaq taama amerlatigisut Danmarkimut saarngujartortarnerannut.
Apeqqummik tamatuminnga qaqilerititsisuuvoq Kattusseqatigiit Partiianneersoq Knud Fleischer, taassuma paaserusukkamiuk soraarnerussutisiat pissutaanersut taama amerlatigisut Danmarkimi soraarninngoriartortarnerannut.
- Inuit ilaat ullumikkut namminneq soraarninngornissaminnut ileqqaagaqartarput tamatumalu nassatarisarpaa siornatigutulli pisortanit pensionisiassanik pinngitsuuisinnaatigiunnaarnerat. Tamanna pingaartumik danskinut kisitsisitigut paasissutissat malillugit nunatsinniit nuuttartut amerlanersaannut atuukkunarpoq, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoq Mimi Karlsen Knud Fleischerimut akissummini allappoq.
Taassuma qulakkiivillugu nassuiaatissaqartinngilaa sooq taama amerlatigisut Danmarkimut soraarninngoriartortarnersut taamaattumillu aamma siunnersuuteqarsinnaannginnerarpoq qanoq ililluni amerlanerit nunatsinni soraarnerusalernissaat qulakkeerneqarsinnaanersoq.
Paasissutissat:
Kalaallit Nunaanni:
Soraarnermut kisimiittumut qaammammut 10.291 koruunit angullugit tunniussisoqartarpoq.
Aappariit tamarmik soraarnerugunik tamarmik qaammammut 7.017 koruuninik pissarsisarput.
Siusinaartumik soraarnerussutisiat kisimiittumut qaammammut 8.335 koruunit angullugit amerlassuseqarput.
Danmarkimi:
Soraarnerussutisianillut tunngaviusumik tunniunneqartartut qaammammut 5.552 koruuniupput. Kisimiittut qaammammut 5.766 koruuninik tapisisinnaapput
Siusinaartumik kisimiittumut soraarnerussutisiat: qaammammut 16.1594 koruunit
