Danmarkimit isiginngitsuusaarneqarpoq
Juliane Henningsen ilaatigut ima allappoq:
-Naalagaaffeqatigiit isertortumik paasiniaasartuisa timmisartuutaasa tigusanik angallassinerminni Kalaallit Nunaata silaannartaanik, timmisartoqarfiinillumi, atuisarsimanera ukiuni arlalinni sakkortuumik saaffiginnissutigiuaraluarlutigu, danskit naalakkersuisuisa tamanna isiginngitsuusaaginnartuarpaat iliuuseqarfiginiarnagulu, Juliane Henningsen allappoq, nangipporlu:
-USA-p inatsisit unioqqutillugit aallarussisarnera, tigusanillu naalliutsisarnera, ilumut pisartoq maanna paasineqarpoq, tamatumunngalu akisussaaqataasugut erserpoq. USA-p taama pisarnera unitsinneqartariaqarpoq.
Danskit naalakkersuisuisa USA aamma piumaffigisariaqarpaat uppernarsaatillugulu, timmisartornissamut akuersissut pillugu Danmarkip USA-llu isumaqatigiissutaat nunarsuaq tamakkerlugu inatsisinik atortitsinermut isumaqatigiissutinut tunngassuteqartunut aaqqiagiinnginnerni atorneqartassanngitsut, Juliane Henningsen allappoq.
Inatsisartunut ilaasortaq, Josef Motzfeldt, Nunanut Allanut Tunngassuteqartunut Ataatsimiititaliami ilaasortaasoq, Naalakkersuisunut qaammat kingullerli apeqquteqarpoq, inerteqqutaasumik timmisartuussisarnerit taakku ilisimasaqarfigineraat. Danmarkip silaannartaa Kalaallit Nunaannut aamma atavoq.
