Danmarkimi uumasuusivissuit nappaammut akiuussutissamik kapuuilerput

Danmarkimi tigutsisilimmik timmissat nappaataannik ulorianartumik nappaatilimmik Svinø Strandimi Sjællandip kujasissortaani nassaartoqarmalli innuttaasunik eqqissisaasoqarpoq.

Nakorsaaneq Steffen Glismann Statens Seruminstitutiminngaanneersoq oqarpoq, timmissat nappaataat timmiaatinut suliffissuarnullu kisimi uloriartuusoq, inunnullu tuniluunnissaanut ulorianarnera suli annikitsuararsuusoq.

Københavnimi Odensemilu uumasuusivissuit timmiaatitik timmissat nappaataannut ulorianartumut H5N1-mik taaneqartartumut illersorniarlugit akiuussutissamik kapuulersimavaat.

-Maanna Danmarkimi timmissat nappaataannik toqquteqarsimasumik nassaartoqarpoq, akiuussutissamillu kapuuilernissarput piffissanngorpoq, Københavnimi uumasuusivissuarmi uumasunut nakorsaaneq Carsten Grøndahl oqarpoq.

Timmissalli nappaataannik nassaartoqarnera uumasuusivissuarmi paatsiveerutsitsinngitsoq, ilanngullugu aamma oqaatigaa.

Danskit uumasuusivissuini akiuussutissamik kapuuisoqarnissaanik EU-mit akuersisoqarmalli Københavnip uumasuusivissuani sapaatit-akunnerini arlalinni akiuussutissamik kapuuinissaq piareersimaffigineqarsimavoq.