Danmarkimi tunillatsittut tunillattagaat ikilisut – tulunniilli allanngortoq ilungersunartoq

Tunillatsittut tunillattagaat 0,6-imut ikilipput. Tulunniilli virusi allanngortoq Danmarkimi qularnermik pilersitsivoq.
B117-ip tunillaassuutianerungaatsiarnera pissutigalugu Danmarkimi coronavirusinit tunillaassuuttunit februaarip qeqqanit annertulerulerumaartoq, danskit oqartussaasuisa naatsorsuutigaat. Assi © : Henning Bagger/Ritzau Scanpix
Allattoq Ritzau
januaarip 19-at 2021 12:08
Nutserisoq Connie Fontain

Danmarkimi tunillatsittut tunillattagaat 0,9-mit sapaatip akunnerata siuliani 0,6-imut ikilipput.

Danskit peqqinnissamut ministeriat, Magnus Heunicke (S) Twitterikkut paasissutissiivoq.

Tunillatsittut tunillattagaasa 0,6-imiinnera tassa imaappoq inuit qulit tunillatsissimagaangata agguaqatigiissillugu allat arfinillit tunillatsittarput. Allatut oqaatigalugu nappaalasoqarnera annikilliartorpoq.

Tuluit Nunaanniilli virusip allanngortoq – B117 – tunillaassuuttoqarneranut atatillugu qularnermik pilersitsivoq, B117-imi tuniluutianeruvoq.

Innuttaasut virusimik allanngortumik nutaamik tunillatsittut amerliartortut Magnus Heunickep twetterikkut erseqqissaatigaa.

Kisitsisilli qularnangaatsiartut aamma allappaa.

- Napparsimmavimmi uninngasut amerlassusaat suli qaffasippoq. B117 danskit akornanni nappaalatitsilinnginnerani kisitsit appartinneqassaaq.

AAMMA ATUARUK Heunicke: Covid pillugu killilersuinerit sapaatit akunnerinik pingasunik sivitsorneqarput

- Ikiortigut, misissortigit, Heunicke twitterikkut allappoq.

B117 coronavirusimit nalinginnaasumit 50-it 74 procentillu akornanni tunillaatianerusutut nalilerneqarnikuuvoq.

B117-ip tunillaassuutianerungaatsiarnera pissutigalugu Danmarkimi coronavirusinit tunillaassuuttunit februaarip qeqqanit annertulerulerumaartoq, danskit oqartussaasuisa naatsorsuutigaat.

Danskit naalakkersuisuisa pissutsit nakkutigineqarsinnaanissaat pissutigalugu killilersuinernik assigiinngitsunik atuilersitsipput. Ilaatigut katerinnissamut inerteqquteqarnermi inuit qanittumi tallimaannaasinnaalersinneqarput

Tamanna B117-ip tunillaassuunnerata sukkassusaanut appaasinnaanissaa siunertaavoq, taamaalilluni peqqinnissaqarfik malinnaasinnaassalluni.

Inuit 817-it coronavirusimik tunillatsissimallutik Danmarkimi napparsimmavinni uninngasut, Statens Serum Institutimit kisitsisit kingulliit takutippaat.

Napparsimmavimmi uninngasunit 817-init 132-it peruluttut uninngavianniipput, taakkunanngalu 85-it anersaartuuteqartinneqarlutik.

Aamma atuaruk