Danmarkimi suliffissaaleqisut 100.000-it sinneqalerput

Danmarkimi suliffissaaleqisut maanna 100.000-it sinneqalerput. Suliffissaaleqisut maajip ingerlanerinnaani 7.000-inik ilapput sulilu amerliartorlutik.
Allattoq Najaaraq Egede
juulip 30-at 2009 10:43

Ernumagisamit ajornerusoq sulisartut kattuffissuanni LO-mi aningaasarsiornermi pisortaq Jan Kjærå Rasmussen oqarpoq.

- Tamanna tupaallaatigeqaara pakatsissutigalugulu, ernumagisatsinniimmi ajornerusoq maanna takusinnaavara. Qallunaat naalakkersuisuisa suliffissaaleqinermik akiuiniarnerat maannamut naammassimanngitsoq paasinarsivoq, Jan Kærå Rasmussen oqarpoq.

Suliffissuaqarnermi sanaartornermilu sulisartut kisimiunngitsoq maanna suliffissaaruttalerput, aamma ilinniagartuut allaffimmiut maannalu pisiniarfimmiut suliffissaaruttut amerliartuinnalerput. Tassa suliffeqarfinni namminersortuni suliffissaaruttut amerliartuinnalerput.

Maannamut suliniutaasut allanngortinneqanngippata suliffissaaleqisut amerliartuinnassapput. Nunarsuarmi aningaasarsiorneq maanna ingerlanerliorpoq Danmarkimilu aningaasaqarnermut politikki iluaqutaagaluartoq suliffissaaleqisut amerliartornerisa unikaallatsinneqarnissaanut naammanngilaq. Suliffissaaleqisut ukioq ataaseq qaangiuppat 140.000-it angusimassagaat ilimagaara. Taannaannaanngilarli 150.000-it sinnerumaaraat ernummatigaara, Jan Kjærå Rasmussen naggasiivoq.

Jan Kjærå Rasmussenip DR-imit apersorneqarluni oqaasii Aqqalu Olsvigimit kalaallisuunngortinneqarlutik atuarneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq