Danmarkimi sisamat Salmonellamik toqquteqarput

Namminersornerullutik Oqartussat peqqinnissamut qullersaqarfiat nalunaarpoq Danmarkimi salmonellamik toqquteqartut pillugit Kalaallit Nunaanni aarlerinartorsiortoqanngitsoq erseqqissarluguli puulukinit allanillu neqinit pisut suliarineqarnerini peqqissaarunnissaat pingaaruteqartoq eqqiluisaarnerlu atorneqartariaqartoq.

Aviisip B.T-p nittartagaani bt.dk-mi taama allaaserinnipput. Medisterpølsit Jyllandimi Sjællandimilu neqaarniarfinneersuupput.

- Ernumanissatsinnut pissutissaqarpugut. Salmonellamimmi tunillatsittut ukioq kingulleq aatsaat taama amerlatigaat. Massakkut qulakkeereerparput puulukip neqaa Danmarkimminngaaneersuusoq. Nakorsaaneq Statens Serum Institutimeersoq, Kåre Mølbak, aviisimut oqarpoq.

Puulukinik toqoraaviit pineqartut aqqi suli oqaatigiumanngikkallarpai, neqit sorliit pisiarinaveersaarneqassanersut aamma oqarumanani.

Toqoraaviit pineqartut aappaat neqinik bakteeriartalinnik annertoorsuarnik Norgep killeqarfiani pisiniarfinnut tunisisarsimavoq, norgimiullu aqqanillit tamanna toqqutigaat.

Inuussutissalerinermut nakkutilliisoqarfik naapertorlugu Danmarkimi inuussutissalerinermut nakkutilliisoqarfik misissuinerluttarsimavoq.