Danmarkimi professori: Aleqa Danmarkimiittuuguni ataannarsinnaanavianngikkaluarpoq
Danmarkimi professorip, cand.scient.pol. Robert Klemensenip, Odensemi Syddansk Universitetimi atorfeqartup, Naalakkersuisut siulittaasuata Aleqa Hammondip 1996-imi peqquserluuteqarsimasutut eqqartuussaasimanerminik isertuussisinermigut eqqortumik iliorsimasorinngilaa.
Allattoq Peter Troelsen, Simon Uldum
oktobarip 26-at 2013 07:05
Klemensen Berlingske Tidendemut oqarpoq, Siumup siulittaasuata peqquserluttuliorsimasutut eqqartuussaasimanini aallaqqaataaniilli nalunaarutigisimasariaqaraluaraa, qinersisartut qinersinnginnerminni taamatut eqqartuussaasimanera isumaliutigeqqaarniassammassuk.
-Aleqa Hammondip susimanerminik oqaluttuarsimannginnermigut qinersisartuni salloqittaarisimavai. Danmarkimi politikkikkut siuttoq, assersuutigalugu Helle Thorning-Schmidt (S) taamaaliorsimasutut paasisaasimasuuguni Danmarkimi ministeriunertut ingerlaannarsinnaassanngikkaluarpoq. Aleqa Hammond Danmarkimiittuuguni ataannarsinnaanavianngikkaluarpoq, Robert Klemmensen Berlingske Tidendemut oqarpoq.
