Danmarkimi pisortat aaqqissuussat angisuut taamaateqqugaat

Coronavirusip siaruaatinnginnissaa anguniarlugu sukannersumik taama inassuteqartoqartoq, pisortaq, Søren Brostrøm tusagassiortunik katersuutsitsinermi taama oqarpoq.

Aaqqissuussat inunnit 1000-init amerlanerusunit aamma peqataaffigineqarsinnaasut, taamaatinneqanngikkunik kinguartinneqartariaqarput, ministeriuneq Mette Frederiksen tusagassiortunik ullumi katersuutsitsinermi nalunaaruteqarpoq.

Taamatut inassuteqarneq marsip naanissaanut atuutissasoq, ministeriunerup, Mette Frederiksenip (S) tusagassiortunik ullumi katersuutsitsinermi nalunaarutigaa.

Taamatut nalunaaruteqartoqareersorlu timersornermik pisussat ilaatigut, superligami isikkamik arsaalluni unamminissat aamma arnat angutillu assammik arsarlutik unamminissaat, tusarnaartitsinissat kiisalu Københavnimi arfininngornermi Melodi Grand Prixertoqarnissaa eqqugaapput.

AAMMA ATUARUK Isiginnaartoqarani Melodi Grand Prixertoqassasoq

- Inuinnarnut, ilaqutariinnut, suliffeqarfinnut aaqqissuisartunullu isertitatigut akissaajaataassaaq, inuunermilli naleqaratarsinnaanera pinngitsoortinniarlugu taama alloriarpugut, taamaattumik ataatsimuussuseqarnissamut naammagittarnissamullu inassuteqarpunga, Mette Frederiksen oqarpoq.

Ilinniarfiit suliffeqarfiilluunniit ataatsimoorfiusartuni, ilinniartut tamarmik ilinniartitsisullu inimi ataatsimuunnginnissaat, Peqqissutsimut Aqutsisoqarfimmi pisortaq, Søren Brostrøm oqarpoq.

Aaqqissuisut tamakkiisumik malinnissasut, ministeriunerup naatsorsuutigaa.

- Taamatut inassuteqarneq malinneqassasoq naatsorsuutigaarput, aaqqissuussallu inunnit 1000-init amerlanerusunit peqataaffigineqartussat taamaatinneqassasut. Aaqqissuisut akisussaassusermik takutitsinissaat upperaarput, malinnittoqassanngippallu alloriarnissap tullissaa eqqarsaatigisariaqassavarput, Mette Frederiksen oqarpoq (S).

Danskit 21-t Savalimmiunilu marluk coronavirusimik maannamut tunillatsimasut, ministeriunerip oqaatigaa.