Danmarkimi oqartussat sipaartariaqarput
Amigaatit pingaartumik nunani tamalaani aningaasaqarnikkut ajalusoornikkut pilersimasut. Ileqqaarniuteqarnissamut pilersaarutip kikkut tamarmik sipaarniarnissaat kingunerissavaa, tamatumalu pisuut piitsullu eqqussallugit.
Siunertarineqarpoq Danmarkimi aningaasarsiornerup iluamik ingerlalerseqqinnissaa. Aningaasaqarnikkut ajalusoornerup akiligassanngortissimasai maanna sorsuutigissavavut, ministeriuneq Lars Løkke Rasmussen oqarpoq.
Siunertarineqarpoq ukiuni tulliuttuni pingasuni 24 mia. kr.-it ileqqaarneqassasut. 13½ mia. kr.-it pisortani aningaasartuutit taamaaginnartinneqarnerisigut aaneqassapput, sinneruttut 10½ mia. kr.-it akileraartarnermut killiliussat taamaaginnartinnerisigut nuussinikkullu isertitatigut naalakkersuisunit isertinneqassapput. Pilersaarummi naalakkersuisut naatsorsugaat naapertorlugit atorfillit marluk marlunnik meerallit aappaagu 8.640 kr-inik akeqassapput, ullormusianillu pissarsisartup kisermaap 2.400 kr.-it annaassallugit, utoqqalinersiallillu ataatsip atugassai 1.680 kr.-inik ikilissallutik.
- Taamatut periaaseqarnerput kikkut tamarmik imatorsuaq maluginavianngilaat, aamma naalakkersuisuni ministerit. Ullaaq manna ministerinik ataatsimeeqateqarnitsinni akissarsiatta 5 procentimik ikilisinneqarnissaat aalajangiupparput qallunaallu qinnuigalugit ukiuni marlunni ajalusoornermi akiligassanngorsimasut akilernissaannut ikioqatigiillutik peqataaqqullugit, ingerlaqqinniassagatta, ministeriuneq Lars Løkke Rasmussen oqarpoq.
Naalakkersuineq pillugu suleqaterput Jens Ringberg Christiansborgimiittoq aperineqarpoq sooq maannakkut ileqqaarniuteqartoqalernersoq.
- Tassa aningaasaqarnermut politikkimullu tunngasut pissutigalugit. Aningaasaqarnermut patsisigitinneqartuni kisitsisit nutaat ulloqeqqata siornagut takkupput, taakkunanilu takuneqarsinnaalluni ukiormannaannarmut, tassa 2010-mut, naalagaaffiup missingersuusiaani 99½ milliardinik amigartooruteqartoq. Naalakkersuinermut tunngasuni patsisigitinneqarput Socialdemokratit SF-illu naalakkersuisut sap. akunnerani kingullermi nukingisaarmatigik sulinerunissamik siunnersuut suliareqqullugu. Naalakkersuisut tamatumani soorunalimi eqqarsaqqissaartinneqarput oqarlutillu uagut aamma siunnersuuteqartariaqarpugut, aggustimut septembarimulluunniit utaqqissinnaanngilagut, Jens Ringberg naggasiivoq.
