Danmarkimi naalakkersuisut nutaat ilisaritinneqarput
Ministeriunerup Anders Fogh Rasmussenip qinersinerup kingornagut naalakkersuisunngortitassaanni, Danmarkimi Venstret eqqartuussiveqarneq pillugu ukiorpassuarni oqaaseqartartuat Birthe Rønn Hornbech nunasisunut ilagiinnullu ministerinngussaaq.
Naalakkersuisunngortussat ullaap tungaani ilisaritinneqarmata taanna tupaallaatigineqartunut ilaavoq. Birthe Rønn Hornbech immikkut isummertarnerminik aalajangiussisarnini pissutigalugu ilisimaneqartoq siusinnerusukkut ministerinngortinniarneqaraluaraangami qujaannartarsimagaluarpoq.
Anders Fogh Rasmussenip pingajussaanik naalakkersuisunngortitsinerani ministerit arlallit taarserneqarput soorluttaaq ministeeriaqarfiit ilaat allatut taaguuserneqartut ilaallu atorunnaarsinneqartut.
Soorlu naalagaaffimmi pissutsinut aamma peqqissutsimut ministeeriaqarfik atorunnaarsinneqarpoq tassanilu ministeriugaluartoq Lars Løkke Rasmussen aningaasaqarnermut ministerinngortinneqarpoq. Konservativit angallannermut ministeriutitaraluat Jakob Axel Nielsen peqqissutsimut pinaveersaartitsinermullu ministeriulissaaq.
Avatangiisinut ministeriugaluartoq Connie Hedegaard ministereqarfik nutaaq taaguuteqartoq silap pissusaanut aamma nukissiuuteqarnermut ministeeriaqarfik ministeriuffigilissavaa aamma isumaginninnermut naligiissitaanermullu ministeriugaluartoq Karen Jespersen atugarissaarnermut ministerinngorpoq. Avatangiisinut ministerinngorpoq Venstret naalakkersuinermut tunngasunik oqaaseqartartuat Troels Lund.
Ilaqutariinnermut atuisunullu ministereqarfik atorunnaarsinneqarpoq, tassanilu ministeriugaluartoq Carina Christensen naalakkersuisuniiginnarluni angallannermut ministerinngussaaq.
Ministeriunerup ingerlaqqinnerata saniatigut ministerit qulit ministeriuffimminni ingerlaqqissapput, ilaatigut tassaasut aningaasanut aamma inuutissarsiutinut ministeri Bendt Bendtsen, nunanut allanut ministeri Per Stig Møller, inatsisinik atortitsinermut ministeri Lene Espersen aamma illersornissamut ministeri Søren Gade.
Danmarkimi naalakkersuisunngortut Dronningimut ullumi ilisaritinneqarput.
