Danmarkimi naalagaaffiup karsia minusimiilissaaq
Aningaasaqarniarnikkut ajornartorsiorneq tamatumunnga pissutaatinneqarpoq, aktiat nalingi appariartuinnartut uuliallu akia appariartuinnartoq sinneqartoorutit amigartoorutinngortissimammassuk.
Aningaasaqarniarneq ingerlalluarallarmat akiligassarsiinerit ingasatsikkaluttuinnarsimasut aningaasarliornernut aamma pissutaaqataasorineqarput.
Naalagaaffiup siorna sinneqartoorutai 75 milliardi koruuniupput:
- Aningaasaqarniarnikkut nunarsuarmi ajornartorsiutit ataatsimut isigalugit anigorsinnaanngilagut, Jakob Brøchner Madsen, Australiami Monash Universitymi professori, Danmarkip Radioani apersorneqarluni oqarpoq.
- Kinguariartulernermik eqqugaavugut naalagaaffiillu assigiinngitsut taakkualu qitiusumik aningaasaateqarfiisa tamanna pingitsoortissinnaagunanngilaat, Jakob Brøchner Madsen oqarpoq.