Danmarkimi meeqqat sodavanditorpallaaqaat

Meeqqat Danmarkimi ima sodavanditortigaat, allaat ilaqutariinnermut atuisunullu ministerip Carina Christensenip tamanna ernumassutigilersimallugu.

-Meeqqat annerpaamik liiterip affaannaanik annertutigisumik sap. akunneranut sodavandnitortariaqaraluarput, ministeri isumaqarpoq. Taamaattumillu meeqqat sukkutornerujussuat killiliiviginiarpaa. Peqqinnissaqarnikkut Aqutsisoqarfiup siunnersuut tapersersorpaa.

Ilaqutariinnermut Atuisartunullu ministerip Carina Christensenip siunnersuutaa, Peqqinnissaqarfimmi Aqutsisoqarfiup tapersersorpaa tassalu, sap. akunneranut liiterip affaanik meeqqat sodavandnitortalernissaannik siunnersuuteqarmat.

Apeqqutaaginnalerporlu taamatut siunnersuuteqarneq piviusorsiortuunersoq taama oqarpoq, inuussutissalerinermik sulialik, Preben Vestergaard Hansen, Suhrs Seminariummimeersoq.

- Meeqqat naliginnaasumik nerisaasa saniatigut sukkoq mamakujuttuneersoq 10 procenti taamaallaat naliginnaasumik tunniunneqarsinnaavoq.

Sukkut allaneersut pineqartut tassaapput; sodavandit, milluartakkat, mamakujuit ammalu kaagineersut il.il. Ullormullu liiterip affaatut atsigisumik sodavandnitortaraanni, taava meeqqap sukkutukkami killiffissaa 10 procentiusoq qaangersimassavaa. Tamaattumillu ministerip annerpaamik sapaatip-akunneranut sodavandnitoqqusinera eqqarsaatigissagaanni ullumikkut meeqqat sukkoq pisartagaat annertoorujussooreerpoq.

Innersuussutigiinnassuarpullu, Nunat Avannaamioqatigiit ministeriisa aalajangersaasartuisa innersuussutaat tassalu ullormut nerisat saniatigut sukkoq, tassa sodavandnineersoq, milluartakkaniit imaluunniit mamakujunniit kaaginiilu assigisaannillu taamaallaat 10 procentia meeqqat pisinnaammassuk.

Taama oqarpoq inuussutissalerinermik sulialik, Preben Vestergaard Hansen, Suhrs Seminariumimeersoq.