Danmarkimi katersuiniarnersuaq 130 millioninik isertitsiffiuvoq
Tassami Haitimut Afrikamilu arnanut ikiuiniarnermi 130 millionit koruunit isertinneqarput. Taamaalilluni katersuiniarnermi siorna rekordinngortoq 72 millionit koruuniusoq qaangerneqarujussuartoq, DR-ip nittartagaani allaaserineqarpoq.
Tv-kkut aallakaatitsinerup nalaani inuit ataasiakkaat suliffeqarfiillu tunissuteqarnerisigut, aamma sms-ikkut nassiussat ilaatigut Nunatsinneersut, akitsorterussinerit nuannisarlunilu unammiuaarnerit iluaqutsiullugit millionit koruunerpassuit isertinneqarput.
Isertinneqartut kingunerinik, ikiuiniaqatigiiffiit Haitimut Afrikamullu ikiuiniarnerminni piffissamut ungasinnerusumut isigalutik ikiuiniarsinnaanngorput.
Folkekirkens nødhjælpimi pisortaq Henrik Stubkær katersuiniarnermik naammagisimaarinneqisoq DR-imut ullumi ima oqarpoq:
- Tamanna nuannersorujussuuvoq, aningaasanik taama amerlatigisunik katersisoqarnissaa naatsorsuutigisimanngikkaluarparput. Taamali amerlatigisunik katersisoqarmat, soorlu Folkekirkens nødhjælpimiit Haitimi puiaasaaqqanik imermik imalinnik agguaaginnarata, puilasualiamik imeqarfissamik assaasinnaalissaagut, Henrik Stubkær oqarpoq.
Katersorneqartut aamma Dansk Røde Korsimit nuannaarutigineqaqaat. Katersuiniarnermi pisortaq Kenneth Ørberg ima oqarpoq:
- Maannakkorpiaq ikiortariaqartunik ikiuinitta saniatigut Nunap napparteqqinniarneranut ikiuiniarnissatsinnut akissaqalerpugut, Kenneth Ørberg oqarpoq.
Danmarkimi katersuiniartoqarneranut atatillugu, Nunatsinniit sms-ikkut tunissuteqarsinnaaneq aatsaat siullermeerluni misilinneqarpoq. Katersuiniarnermi Nunatsinniit qanoq isertitsisoqartiginersoq suli oqaatigineqarsinnaanngilaq.
