Danmarkimi kalaallit allaaserineqaqaat
Meeqqat Inuusuttullu Pillugit Ilisimasaqarfiup, MIPI-mik naalisarneqartartup misissuinerata inerneri ippassaq saqqummiunneqartut – Nunatsinni meeqqat piitsuussusiannut tunngasut aviisit ullaakkut saqqummersartut angisuunik qulequtsersorlugit sammivaat.
Ilaatigut aviisimi Politikenimi takisuumik allaaserinnittoqarpoq qulequtserlugu ”Kalaallit meerartaat piitsooqalutik inuupput”, ilaatigullu oqaatigineqarluni meeqqat aqqaniliugaangata ataatsip pisariaqartinneqartut tunngaviusut amigaatigisarai aamma meeqqat ilaqutariit aningaasaqarniarnerannut ikiuunniarlutik sunngiffimminni suliffeqartariaqartartut.
Aviisip Politikenip Nuummi meeqqat ornittagaanni Inneruulami ningiuusoq Kirsten Ørgaard oqaloqatigisimavaa, taassumalu oqaatigaa kalaallit meerartaasa akornanni piitsuussuseq nammineq tupaallaatiginngikkini.
Aviisi Jyllands-Posten aamma MIPI-p misissuinera allaasera qulequtserlugu ”Kalaallit meerartaat piitsuullutik inuupput”. Nutaarsiassaqartitsivillu Ritzau allaaserisaqarpoq qulequtserlugu ”Kalaallit meerartaat kaallutik innartarput”.
