Danmarkimi kalaallinut tusagassiuut nutaaq
Tassalu nittartagaq www.avalanneq.dk, kalaallinut Danmarkimiittunut saaffiginnittoq.
Kalaallit Danmarkimiittut atugarisaasa ilisimasaqarfiginerulernissaat aammalu kalaallit Danmarkimiittut Danmarkimi tusagassiuutit nalinginnaasumik saqqummiuttagaannit allaanerusumik oqaluttuarinissaat siunertaasoq, tusagassiuut tusagassiorfinnut nalunaaruteqarluni taama allappoq.
- Nittartagaq www.avalanneq.dk kalaallit Danmarkimiittut ataatsimut tusaatitut atussavaat. Danmarkimi inuiattut naleqartitatoqqavut ataqqineqarnerpullu uummarsaqqittariaqarpagut, tusagassiuut tusagassiorfinnut nalunaarummini taama allappoq.
Pingaartumillu kalaallit pillugit isummat pigiliutiinnakkat allanngortinniarnissaat tusagassiuutip peqataaffigerusuppaa.
Ilaatigut KNR-imi nutaarsiassalerinermut pisortaasimasoq, politikkimilu aallutaqarsimasoq, Johannes Mathiassen tusagassiuummik taassuminnga nutaamik avalannermik pilersitsisuuvoq.