Danmarkimi illuatungeriit isumaqatigiinnialerput
Danmarkimi ikiuiniarnermik peqqinnissamillu sullissineq sapaatip akunneri marluk sinnerlugit uninngareersoq aaqqiiviginiarlugu, Pisortani Atorfillit Kattuffiat, FOA, Kommunillu nuna tamakkerlugu Kattuffiat maanna isumaqatigiinniarput.
Allattoq Louise M. Kleemann
Kommunit Kattuffiannit isumaqatigiinniartut siuttuat, Mads Lebech, nutaarsiassaqartitsivimmut Ritzauimut taama ilisimatitsivoq. Isumaqatigiinniarnerilli sumut killinneri tusagassiorfinnut annerusumik oqaatigerusunngilai.
-Maanna oqaloqatigeeqqilereerpugut, oqaloqatigiinnerpullu akornatsinni ingerlanneqassaaq, tusagassiorfiit aqqutiginagit, Mads Lebech oqarpoq.
Isumaqatigiinniarnerit ingerlanneqartillugit suliumajunnaarneq, apriilip ulluisa 16-iannili aallartittoq, suli ingerlagassaaq. FOA-mut ilaasortat piumasaraat aningaasarsiatik 15 procentimik qaffassasut. Ilaasortat 35.000-it suliaminnik unitsitsinikuupput.