Danmarkimi Illersornissamut ministereqarfik Kangerlussuarmi iluarsartuussilerpoq
Kangerlussuarmi mittarfiup iluarsartuunneqarnissaa Inatsisartut aalajangiivigisussaavaat, tassa imarpik Atlantiku qulaallugu timmisartuussisarnernut Nuummi mittarfeqalissanersoq tassani apeqqutaalluni. Danmarkimili Illersornissamut ministereqarfik aalajangerpoq, Kangerlussuarmi timmisartunut iniliaq sannaviillu iluarsartuunniarlugit, sakkutuut timmisartuutaat Kalaallit Nunaannut sullissisartoq, maannalu iluarsaanneqarnermini tassani inissisimavoq.
Timmisartunut iniliaq nutaamik qalialerneqassaaq taavalu amerikamiut sakkutuuisa inigisimasaanni innaallagissamut sillimmatinik atortulersuisoqassalluni, amerikamiut sakkutuuisa inaat danskinit 1992-imi oqartussaaffigineqalerput.
Inissiat pineqartut amerikamiut 1957-imi sanavaat, taakkulu iluamik oqorsaateqanngillat. Innaallagissap aqqutai tamarmik taarsersorneqassapput innaallagissap sarfaanut sakkortuumut inatsimmut naapertuutinngimmata. Sillimmatitut sarfaliuummik aamma pilersitsisoqassaaq.
Iluarsartuussinermut 27,7 millioni koruunit atorneqarnissaat ilimagineqarpoq, Illersornissamullu Danmarkimi ministerip, Søren Gade-p, Venstremeersup, aningaasat taakku aningaasaqarnermut Folketingimi ataatsimiititaliaanut qinnutigereerai nutaarsiassaqartitsivik Ritzau allappoq.
